भाजप नेते डॉ. कराड सायंकाळी सात साडेसात वाजेदरम्यान राहत्या घरी कार्यकर्त्यांशी बोलत होते. त्याचवेळी दुचाकीवरून आलेल्या काही समाजकंटकांनी कराड यांच्या घरावर तसेच दोन वाहनांवर दगडफेक केली, यात वाहनांचे नुकसान झाले आहे.
घटनेची माहिती मिळताच पोलीस घटनास्थळी दाखल आहेत. पोलिसांनी घटनास्थळी पंचनामा करून हल्लेखोरांचा शोध सुरू केला आहे. आमदार अतुल सावे यांच्यासह भाजपचे कार्यकर्ते व पदाधिकारीही मोठ्या संख्येने घटनास्थळी पोहचले आहेत.
हल्ला राजकीय संघर्षातून?
औरंगाबाद महापालिकेची निवडणूक जवळ आली आहे. त्यामुळे शहरातील राजकीय वातावरण बरंच तापलं आहे. त्यातच नुकताच किशनचंद तनवाणी या शहरातील एका प्रमुख नेत्याने भाजपला रामराम ठोकून पुन्हा शिवसेनेत प्रवेश केला. त्यांच्यासोबत काही नगरसेवकही शिवसेनेत गेले आहेत. या घडामोडींनंतर स्थानिक पातळीवर शिवसेना व भाजप नेत्यांमध्ये आरोप-प्रत्यारोपाच्या फैरी झडू लागल्या आहेत. या संघर्षातूनच कराड यांच्या घरावर हल्ला झाल्याचे प्रथमदर्शनी दिसत आहे. याबाबत पोलीस तपासात अधिक बाबी पुढे येणार आहेत.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
