जगभरातील प्रमुख शेअर बाजारात आज घसरण दिसून आली आहे. फेडरल रिझर्व्हच्या बैठकीकडे गुंतवणूकदारांचे लक्ष लागले आहे. तर नाणेनिधीच्या ताज्या अहवालाने गुंतवणूकदारांच्या मनात धडकी भरवली आहे. त्याचे पडसाद आज भारतीय बाजारांवर उमटले. आज बँका, वित्त संस्था, एफएमसीजी या शेअरमध्ये गुंतवणूकदारांनी विक्री केली.
सेन्सेक्समध्ये ३० पैकी २३ शेअर घसरले आहेत. ज्यात डॉ. रेड्डी लॅब, एल अँड टी , एचडीएफसी, टीसीएस, भारती एअरटेल, टाटा स्टील, पॉवरग्रीड, एसबीआय, बजाज ऑटो, रिलायन्स, इन्फोसिस, टायटन, एशियन पेंट , एचडीएफसी बँक या शेअरला आज झळ बसली. तर इंडसइंड बँक , बजाज फायनान्स, टेक महिइंद्र, आयटीसी, महिंद्रा अँड महिंद्रा हे शेअर तेजीत आहे.
वाचा :
शेअर बाजारात एंट्री घेतल्यापासून सुस्साट पळणाऱ्या झोमॅटोच्या तेजीला आज ब्रेक बसला आहे. आज गुंतवणूकदारांनी यात नफा कमाई केल्याने झोमॅटोचा शेअर ६ टक्क्यांनी घसरला आहे. सध्या बीएसईवर झोमॅटोचा शेअर १२६.३० रुपये असून त्यात ४.७५ टक्के घसरण झाली आहे. एनएसई वर तो १२६.१० रुपये असून त्यात ५.१२ टक्के घसरण झाली आहे.
आज फार्मा शेअरला देखील विक्रीची झळ बसली आहे. जीएसके फार्मा, टोरेंट फार्मा, आरती इंडस्ट्रीज, सिप्ला, आलेम्बिक फार्मा या शेअरमध्ये घसरण झाली आहे. सध्या मुंबई शेअर बाजाराचा सेन्सेक्स ४५० अंकांनी घसरला असून तो ५२१२७ अंकावर ट्रेड करत आहे. निफ्टी १३५ अंकांच्या घसरणीसह १५६१० अंकावर आहे.
करोनाच्या दुसऱ्या लाटेचा अर्थव्यवस्थेला जोरदार फटका बसला असून त्याची मोठी किंमत मोजावी लागण्याची शक्यता आहे. आंतरराष्ट्रीय नाणेनिधीने चालू वर्षाचा जीडीपी अंदाज ९.५ टक्के इतका कमी केला आहे. याआधी १२.५ टक्के जीडीपी राहील, असे नाणेनिधीने म्हटलं होते. मात्र मार्च ते मे या कालावधी करोनाच्या दुसऱ्या लाटेने लॉकडाउन लागू करावा लागला. यामुळे मोठं नुकसान झाल्याचे नाणेनिधीने म्हटलं आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
