दिल्ली हिंसाचार; शहांची ३ तास मॅरेथॉन बैठक

नवी दिल्लीः दिल्लीत नागरिकत्व दुरुस्ती कायद्यावरून (सीएए) सुरू असलेला हिंसाचार आणखी उग्र होत लागला आहे. या पार्श्वभूमीवर केंद्रीय गृहमंत्री अमित शहा यांनी दिल्ली पोलीस आणि प्रशासनातील सर्व वरिष्ठ अधिकाऱ्यांसोबत तीन तास मॅरेथॉन बैठक घेतली. या बैठकीत शहा यांनी सर्व परिस्थितीचा आढावा घेतला. या बाठकीला दिल्लीचे नवनियुक्त विशेष पोलीस आयुक्त एस.एन. श्रीवास्तवही उपस्थित होते.

दिल्लीतील वाढता हिंसाचार पाहता अमित शहा यांनी तिरुवनंतपूरमचा दौरा रद्द केलाय. पद्म विभूषण पी. परमेश्वरनजी यांच्या प्रार्थना सभेसाठी ते केरळला जाणार होते. अमित शहा यांनी गेल्या २४ तासांत घेतलेली ही तिसरी बैठक होती. जवळपास तीन तास ही बैठक चालली. या बैठकीत दिल्ली पोलीसमधील वरिष्ठ अधिकारी, केंद्रीय गृहमंत्रालयाचे अधिकारी होते.

दिल्लीतील हिंसाचारात आतापर्यंत १३ जणांचा मृत्यू झाला आहे. तर दगडफेकीत १८० हून अधिक जण जखमी झालेत. दिल्ली पोलिसांनी नागरिकांना इशारा दिला आहे. दिसताच क्षणी गोळी घालण्यात येईल, अशी घोषणा दिल्ली पोलिसांकडून हिंसाचारग्रस्त भागात केली जातेय. हिंसाचारामुळे ईशान्य दिल्लीतील शाळा, कॉलेज उद्या बंद ठेवण्याचे आदेश देण्यात आलेत. तर सीबीएसईने या भागातील १०वी आणि १२वीच्या परीक्षा पुढे ढकलल्या आहेत.