Raja.Gaikwad@timesgroup.com

Tweet : @rajagaikwadMT

पिंपरी : ‘साहेब, माझ्या कानात परग्रहावरील कोणीतरी बोलतंय, ते माझ्यावर नजर ठेवतात,’अशी तक्रार घेऊन एक वयस्क महिला आणि पुरुषाने थेट ‘सायबर सेल’कडे धाव घेतली. एवढेच नव्हे तर आपल्या शरीरात अमेरिकेने चिप लपवली आहे, असा दावा करीत एका उच्चशिक्षित तरुणानेही ‘सायबर सेल’कडे धाव घेऊन मदतीची याचना केली आहे. या तक्रारींचे निराकरण कसे करायचे, या विचाराने पोलिसही काही काळ गोंधळले होते. मात्र, हा एक प्रकारचा मानसिक आजार असून, या आजारात भ्रम होत असल्याचे निष्पन्न झाल्याने संबंधित व्यक्तींना अखेर डॉक्टरांकडे जाण्याचा सल्ला देण्यात आला.

काही दिवसांपूर्वी एक वयस्क महिला खूप घाबरलेल्या अवस्थेत पिंपरी-चिंचवड पोलिस आयुक्तालयातील ‘सायबर सेल’च्या कार्यालयात आली. ‘साहेब माझ्या कानात परग्रहावरील कोणीतरी बोलतंय, मला त्यांचा आवाज ऐकू येतोय, ते मला काहीतरी सांगत आहेत, मला खूप भीती वाटत आहे,’ असे सांगून कारवाई करण्याची विनंती या महिलेने केली. त्यानंतर आणखी एक वयस्कर व्यक्ती सायबर सेलकडे आली. ‘माझ्या डोळ्यात कोणीतरी लहरी सोडल्या असून, त्याद्वारे ते माझ्या डोळ्यांतून सर्व पाहतात,’अशी तक्रार त्यांनी केली. विशेष म्हणजे अमेरिकेमध्ये नोकरी करणारा एक उच्चशिक्षित तरुणही अशाच प्रकारची तक्रार घेऊन ‘सायबर सेल’कडे आला होता. ‘अमेरिकेतून भारतात येताना तेथील लोकांनी आपल्या शरीरात एक चिप लपविली आहे. या चिपद्वारे ते काहीही करू शकतात. सध्या ते माझ्यावर लक्ष ठेवून आहेत,’ असे त्यांचे म्हणणे होते.

गेल्या काही दिवसांत आलेल्या या तीन तक्रारींमुळे ‘सायबर सेल’चे अधिकारीही चक्रावले. मात्र, या लोकांशी चर्चा करून त्यांचे म्हणणे समजून घेतल्यानंतर या नागरिकांना भ्रम होत असल्याचे अधिकाऱ्यांच्या लक्षात आले. ‘पॅरान्युइया हल्युसिएशन’ असे या आजाराचे नाव असून, एकटे पडल्यावर किंवा मोठे संकट आल्यावर हा मानसिक आजार होऊ शकतो, अशी माहिती अधिकाऱ्यांना समजली. त्यानुसार अधिकाऱ्यांनी या नागिरकांना मानसोपचार तज्ञांकडे जाण्याचा सल्ला दिला.

दोन्ही वयस्क व्यक्तींना त्यांच्या वयोमानानुसार आणि एकटेपणामुळे भ्रम होत असल्याचे लक्षात आले. करोनामुळे नोकरी गमविल्याने संबंधित तरुणाला अमेरिकेहून भारतात यावे लागले. याचा मोठा धक्का बसल्याने या आजाराची लक्षणे दिसू लागली असावीत. या तरुणाच्या घरच्यांना संपर्क करून त्याच्या आजाराविषयी माहिती देण्यात आली आहे.

– डॉ. संजय तुंगार, वरिष्ठ पोलिस निरीक्षक, सायबर सेल

माझ्या विरोधात कोणीतरी कट करतंय, मला त्रास देत आहेत असे वाटणे याला पॅरान्युइया हल्युसिएशन असे म्हणतात. यामध्येही नॉन बिझार्ड डायल्युशन हा एक प्रकार आहे. यामध्ये जे प्रत्यक्षात घडू शकत नाही, असे भ्रम होतात. संबंधित नागरिकांना वरील प्रकारची लक्षणे दिसत असून, त्यावर उपचार करणे शक्य आहे.

– डॉ. मनजित संत्रे, विभाग प्रमुख, मानसोपचार विभाग, वायसीएम रुग्णालय

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here