म. टा. विशेष प्रतिनिधी,
करोना संसर्गाला प्रतिबंध करण्यासाठी लसीकरणाचा वेग वाढवण्याची गरज सातत्याने व्यक्त केली जात आहे. मात्र त्यात लसमात्रांच्या कमतरतेमुळे अडथळा येत आहे. त्यामुळेच तिसऱ्या लाटेची शक्यता लक्षात घेऊन बहुसंख्यांना एक मात्रा द्यावी की, ज्यांनी एक मात्रा घेतली आहे त्यांना दुसरी मात्रा द्यावी, अशी चर्चा वैद्यकीय क्षेत्रामध्ये सुरू आहे.

लसमात्रांची पुरेशी उपलब्धता नसल्यामुळे या महिन्यात काही दिवस लसीकरण केंद्रे बंद होती. ऑगस्टमध्ये लसीची दुसरी मात्रा घेणाऱ्यांसाठी अनेक ठिकाणी उपलब्धता सुरळीत नसल्यामुळे खासगी केंद्रांचा आधार घ्यावा घ्यावा लागत आहे.

केंद्र सरकारकडून मागील पंधरा दिवसांमध्ये राज्याला मिळालेल्या लसमात्रांची संख्या अपुरी आहे. शहरांप्रमाणे ग्रामीण भागांमध्ये काही ठिकाणी संसर्गाची शक्यता वाढत आहे. त्यामुळे तिथे लसीकरणाचा वेग वाढवण्याची गरज आहे. ग्रामीण भागांतील बहुसंख्य नागरिक खासगी केंद्रातून लसीकरण करण्याऐवजी सरकारी सुविधेचा पर्याय स्वीकारत आहेत. त्यामुळे अशा केंद्रावर लसमात्रांची उपलब्धता असणे गरजेचे आहे. शिवाय दुसरी मात्रा वेळेवर उपलब्ध न झाल्यास करोनाविरोधी प्रतिकारशक्ती कमी होण्याची शक्यता आहे का, असा प्रश्न उपस्थित होत आहे.

टास्क फोर्सचे सदस्य डॉ. अविनाश सुपे यांनी, पहिली मात्रा घेतल्यानंतर किती जणांमध्ये रोगप्रतिकारशक्ती निर्माण झाली किंवा दोन्ही लसमात्रा घेतल्यानंतर किती जणांमध्ये करोनाप्रतिबंधक प्रतिकारशक्ती विकसित झाली याचा निश्चित निष्कर्ष काढता येईल. मात्र असा अभ्यास अद्याप झालेला नाही, असे सांगितले. असा अभ्यास होणे गरजेचे आहे.

‘बुस्टर मात्रविषयी चर्चा’

करोनाकाळामध्ये रुग्णसेवा देणारे संसर्गजन्य आजाराचे तज्ज्ञ डॉ. विकास पाटील यांनी, अनेक डॉक्टरांनी स्वतः काही चाचण्या करून किती टक्के अँटिबॉडीज शरीरामध्ये आहेत हे तपासून पाहिल्याचे सांगितले. त्यानुसार जानेवारीमध्ये ज्यांनी पहिली मात्रा घेतली होती त्यांच्यामध्ये अँटिबॉडीज कमी दिसून येतात. त्यामुळे दोन्ही मात्रांचा देण्याचा आग्रह धरत असताना आता बूस्टर मात्रेविषयीही चर्चा व्हायला हवी, असेही ते म्हणाले. मात्र लसमात्रांची उपलब्धता नसताना हे कसे शक्य होणार हा प्रश्नही त्यांनी उपस्थित केला.

‘लसीकरणाची व्याप्ती वाढावी’
लसीकरणाची व्याप्ती जेवढी जास्त तेवढी सुरक्षितता वाढेल. गंभीर आजारांचे प्रमाण कमी होईल. सामान्यांच्या मनातील भीती कमी होईल. तसेच रुग्णालयातील गर्दी आणि आरोग्य कर्मचाऱ्यांवरील दडपण कमी होईल. गंभीर रुग्ण कमी झाले तर विषाणूमधील जनुकीय परिवर्तनाची शक्यता कमी होईल, त्यामुळे संसर्ग नियंत्रणात आणण्यासाठी मदत होईल, याकडेही वैद्यकीय तज्ज्ञ लक्ष वेधत आहे.

४५ कोटी नागरिक लसविना
सूक्ष्मजीवशास्त्राचे अभ्यासक डॉ. माधव साठे म्हणाले की, आजपर्यंत पन्नास कोटींच्या आसपास नागरिकांना एक लसमात्रा दिली गेली आहे. आपली लोकसंख्या १४० कोटींच्या आसपास आहे. त्यापैकी शून्य ते सतरा या वयोगटासाठी अजून तरी लस नाही. या वयोगटामध्ये ४५ कोटी मुले येतात. म्हणजे ९५ कोटी जनतेला लस द्यायची आहे. त्यातील ५० कोटी लोकांना एक डोस दिला आहे, हे प्रमाण ५३ टक्के असावे. याचाच अर्थ ४५ कोटी नागरिकांना एकही लसमात्रा मिळालेली नाही, याकडे त्यांनी लक्ष वेधले.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here