नाशिकात भाजप कार्यालयावर दगडफेक, सांगलीत शाई फेक आंदोलन तर सोलापूरात राणेंच्या पोस्टरला चपलांचा हार घालण्यात आला आहे. त्यामुळं राणेंच्या त्या वक्तव्यामुळं राज्यभर गोंधळाचे वातावरण निर्माण झाले आहे. या निमित्ताने शिवसेना विरुद्ध भाजप असा संघर्ष पेटला असून भाजप आपल्या नेत्याची म्हणजे नारायण राणेंची बाजू सावरण्याचा प्रयत्न करत आहे.
यामुळे राज्यातील सर्वच भाजप नेत्यांना आता सतर्क करण्यात आले आहे. याच पार्श्वभूमिवर दोन दिवसांच्या सोलापूर दौऱ्यावर आलेल्या आशिष शेलार यांना तातडीने मुंबईत बोलावण्यात आले आहे. शेलार यांनी आपले सर्वच नियोजित कार्यक्रम गुंडाळून मुंबईसाठी रवाना झाले आहेत. सोलापुरातल्या माध्यमांना प्रेस असल्याचा निरोप देण्यात आला होता. पण आता स्थानिक भाजप नेते ही प्रेस रद्द झाल्याचं सांगत आहेत.
दरम्यान, मुख्यमंत्री उद्धव ठाकरे यांच्याबद्दल आक्षेपार्ह वक्तव्य केल्याच्या निषेधार्थ आज राज्यभर शिवसैनिकांकडून नारायण राणे यांचा निषेध केला जात आहे. सांगली शहरातही शिवसैनिक राणेंच्या विरोधात आक्रमक बनले आहेत. संतप्त शिवसैनिकांनी भाजपचे आमदार सुधीर गाडगीळ यांच्या कार्यालयासमोर असलेल्या पोस्टरवरील नारायण राणे यांच्या प्रतिमेला काळे फासले. तर, नाशिकमध्ये युवा सेनेच्या कार्यकर्त्यांनी भाजपच्या कार्यालयावर दगडफेक केली. त्यामुळं दोन्ही ठिकाणी तणावाचं वातावरण आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
