एक आक्षेपार्ह व्हिडिओ व्हायरल झाल्याने माजी आमदार नरेंद्र मेहता यांनी महापौर निवडणुकीच्या तोंडावर अचानक भाजपला रामराम केला. दुसरीकडे अपक्ष आमदार गीता जैन यांनीही भाजपपासून दूर राहण्याचा निर्णय जाहीर केला. त्यामुळे मिरा भाईंदरमध्ये ऐनवेळी उलथापालथ होऊ शकते, असे दिसत होते. मात्र प्रत्यक्षात भाजपला फार मोठा फटका बसला नाही. महापौरपदी भाजपच्या ज्योत्स्ना हसनाळे यांनी तर उपमहापौरपदी भाजपचेच हसमुख गेहलोत यांनी विजय मिळवला.
भाजप विरुद्ध महाविकास आघाडी अशीच ही लढाई झाली. ९५ सदस्यीय पालिकेत ६१ नगरसेवकांसह भाजपकडे स्पष्ट बहुमत असून शिवसेनेचे २२ तर काँग्रेसचे १२ नगरसेवक आहेत. काँग्रेसने आजच्या निवडणुकीत शिवसेनेला साथ दिली. शिवाय भाजपच्या मोरस रॉड्रिक्स, अश्विन कसोदरिया, वैशाली रकवी, परशुराम म्हात्रे व गीता जैन या पाच नगरसवेकांनीही शिवसेनेच्या पारड्यात आपली मते टाकली. तरीही शिवसेनेचे बळ तोकडेच पडले. हसनाळे यांना ५५ तर शिर्के यांना ३६ मते मिळाली.
शिवसेनेच्या दीप्ती भट, अनिता पाटील, काँग्रेसच्या सारा अक्रम खान, भाजपचे विजय राय असे चार सदस्य आज अनुपस्थित होते. काँग्रेस नगरसेविका उमा सपार या गेल्या काही दिवसांपासून रुग्णालयात उपचार घेत आहेत. तिथून त्यांना थेट मतदानासाठी आणण्यात आलं.
दरम्यान, हसनाळे यांचा कार्यकाळ अडीच वर्षांचा असणार आहे. विद्यमान महापौर डिंपल मेहरा यांचा कार्यकाळ २७ फेब्रुवारी म्हणजेच उद्या संपत असून त्यांच्याकडून हसनाळे पदभार स्वीकारणार आहेत.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
