म. टा. प्रतिनिधी, सांगली: सांगली शहरातील उत्तर शिवाजीनगर येथे राहणाऱ्या एका महिला उद्योजिकेस दुबईतील व्यापारी कंपनीने तब्बल दीड कोटींना गंडा घातला आहे. तासगाव येथून पाठवलेल्या सात कंटेनर द्राक्षांच्या रकमेपोटी कंपनीने दिलेला धनादेश वटलाच नाही. यानंतर वारंवार मागणी करूनही दुबईतील कंपनीने पैसे दिले नाहीत. फसवणूक झाल्याचा प्रकार लक्षात येताच पौर्णिमा विजय पाटील (वय ४२) यांनी रविवारी (ता. १२) विश्रामबाग पोलिसात फिर्याद दिली आहे. त्यांच्या फिर्यादीवरून दुबईतील एल.एल.सी कंपनीच्या पाच जणांवर गुन्हा दाखल करण्यात आला.

महम्मद फारुख, बडू अहमद जुमा हुसेन, मॅनेजर दिलीप जोशी, पर्चेस मॅनेजर मजीद जलाल, फायनान्स प्रमुख मंगेश गांगुर्डे (सर्व रा. दुबई) अशी गुन्हा दाखल झालेल्या संशयितांची नावे आहेत. याबाबत अधिक माहिती अशी की, फिर्यादी पौर्णिमा पाटील यांचा द्राक्षे निर्यातीचा व्यवसाय आहे. दरवर्षी त्या सांगलीतून परदेशात द्राक्षांची निर्यात करतात. १ नोव्हेंबर २०१९ ते ३१ मार्च २०२० या कालावधीत त्यांनी दुबईस्थित एल.एल.सी कंपनी सोबत करार केला होता. कंपनीचे मालक आणि त्यांच्या कर्मचाऱ्यांनी पाटील यांचा विश्वास संपादन करून मालाचे पैसे तात्काळ देण्याचे आश्वासन दिले होते. त्यांच्या करारानुसार सांगली जिल्ह्यातून द्राक्षे दुबईला पाठवायची होती. कराराप्रमाणे पाटील यांनी द्राक्षांचे सात कंटेनर दुबईला पाठविले होते.

वाचाः

त्याची एकूण किंमत १ कोटी ३६ लाख रुपये इतकी होती. खरेदी केलेल्या मालाचे पैसे न देता ७६ लाख ६३५ रुपयांचा अमेरिकन डॉलरचा खोटा धनादेश पाठवला. बनावट धनादेश असल्याने पाटील यांच्या कंपनीच्या बँक खात्यावर पैसे जमा झाले नाहीत. पौर्णिमा पाटील यांनी वेळोवेळी पाठपुरावा केला. मात्र त्याला दुबईस्थित कंपनी आणि त्यांच्या कर्मचा-यांनी दाद दिली नाही. फसवणूक झाल्याचे लक्षात येताच त्यांनी विश्रामबाग पोलिस ठाण्यात कंपनीच्या विरोधात फिर्याद दाखल केली आहे. त्यांच्याकडे असणाऱ्या कागदपत्रांच्या आधारे चौकशी करून पोलिसांनी दुबई स्थित कंपनीच्या महम्मद फारुख, बडू अहमद जुमा हुसेन, मॅनेजर दिलीप जोशी, पर्चेस मॅनेजर मजीद जलाल, फायनान्स प्रमुख मंगेश गांगुर्डे यांच्यावर गुन्हा दाखल केला आहे. याप्रकरणी अधिक तपास सहायक पोलीस निरीक्षक अमित पाटील हे करत आहेत.

वाचाः

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here