म. टा. विशेष प्रतिनिधी,

बंगालच्या उपसागरात सक्रीय झालेल्या प्रणालीमुळे राज्यात पुन्हा पाऊस सुरू झाला आहे आणि परिणामी पावसाळा सुरू झाल्यापासून पहिल्यांदाच राज्यातील सर्व जिल्ह्यांमध्ये सरासरीच्या श्रेणीमध्ये किंवा अधिक पाऊस नोंदला गेला आहे. राज्यात एकूण पाऊस आत्तापर्यंतच्या अपेक्षित सरासरीच्या १४ टक्के अधिक आहे. तर पुढील पाच दिवसांमध्ये पुन्हा एकदा राज्यात विविध ठिकाणी पावसाची शक्यता वर्तवण्यात आली आहे.

राज्यात मध्य महाराष्ट्रात आत्तापर्यंत सरासरीहून १२ टक्के पाऊस अधिक आहे तर मराठवाड्यात ३२ टक्के अतिरिक्त पाऊस नोंदला गेला आहे. विदर्भात मात्र पाऊस सरासरीच्या श्रेणीत असून अपेक्षित सरासरीहून १ टक्का कमी आहे. मात्र आत्तापर्यंत विदर्भातील काही जिल्हे आणि उत्तर महाराष्ट्रातील काही जिल्हे येथे असलेली पावसाची तूट मागील आणि या आठवड्यातील पावसाने भरून काढली आहे. राज्यातील सर्वच जिल्हे सरासरीच्या श्रेणीमध्ये आले आहेत.

कोकण विभागात रत्नागिरी, सिंधुदुर्ग आणि मुंबई उपनगरे येथे अतिरिक्त पाऊस नोंदला गेला आहे. मध्य महाराष्ट्रात अहमदनगर, धुळे आणि सातारा येथे, मराठवाड्यात औरंगाबाद, बीड, परभणी येथे अतिरिक्त तर जालना येथे तीव्र अतिरिक्त पाऊस नोंदला गेला आहे. विदर्भात मात्र एकाही जिल्ह्यात अतिरिक्त पाऊस नाही. सर्वाधिक पाऊस जालना येथे सरासरीपेक्षा ६९ टक्के अधिक आहे. तर सर्वात कमी पाऊस नंदुरबार येथे सरासरीहून १९ टक्क्यांनी कमी आहे. नंदूरबारमध्ये सप्टेंबरच्या सुरुवातीला ही तूट ४३ टक्क्यांपर्यंत कमी होती. गेल्या दोन आठवड्यात पाऊस पडल्यामुळे पाण्याचा प्रश्न काही प्रमाणात कमी झाला आहे. कोकणामध्ये एकाही जिल्ह्यामध्ये सरासरीपेक्षा कमी पाऊस नोंदला गेलेला नाही. तर मध्य महाराष्ट्रात सांगली जिल्ह्यात सरासरीहून सात टक्के कमी पाऊस नोंदला गेला आहे. मराठवाड्यातही सर्व जिल्ह्यांमध्ये सरासरीहून अधिक पाऊस नोंदला गेला आहे. विदर्भात मात्र अकोला, अमरावती, भंडारा, बुलडाणा, गडचिरोली, गोंदिया येथे अपेक्षित सरासरीहून कमी पाऊस आहे. मात्र हे सगळे जिल्हे आता सरासरीच्या श्रेणीमध्ये आहेत.

पुढील काही दिवसांमध्येही राज्यात पाऊस अपेक्षित आहे. यात रायगड, रत्नागिरीमध्ये सोमवारपर्यंत तुरळक ठिकाणी मुसळधार पावसाचा अंदाज आहे. सिंधुदुर्गात रविवारी आणि सोमवारी तुरळक ठिकाणी मुसळधार पाऊस पडू शकेल. पालघर, ठाणे, मुंबई येथेही सोमवारी पावसाचा जोर वाढण्याची शक्यता आहे. तोवर मध्यम स्वरूपाचा पाऊस पडू शकतो.

जोर वाढण्याची शक्यता
धुळे, नंदूरबार, जळगाव येथे शनिवारी पावसाचा जोर वाढू शकतो. नाशिक, पुणे आणि सातारा येथील घाट परिसरात तुरळक ठिकाणी शनिवार ते सोमवार या काळात मुसळधार पावसाची शक्यता आहे. मराठवाड्यात परभणी, हिंगोली, नांदेड, लातूर येथे तुरळक ठिकाणी सोमवारपर्यंत मुसळधार पाऊस पडू शकतो. विदर्भातही अकोला, अमरावती, वर्धा, यवतमाळ, बुलडाणा या जिल्ह्यांत तुरळक ठिकाणी शुक्रवारी मुसळधार पावसाची शक्यता आहे.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here