पोलिसांच्या शिताफीमुळे धक्कादायक खुलासा; अल्पवयीन मुलीच्या अपहरणाचा प्रकार झाला उघड

: स्थानिक गुन्हे अन्वेषण विभागाच्या गस्ती पथकाच्या सतर्कतेमुळे अल्पवयीन मुलीची छेड काढणाऱ्या ३६ वर्षीय तरूणाच्या मुसक्या आवळण्यात यश आलं आहे. जिल्ह्यात चिपळूण येथील डीबीजे कॉलेजच्या समोर राकेश रमेश चव्हाण या संशयित तरुणाची चौकशी करून अटक करण्यात आली आहे. अल्पवयीन मुलीच्या अपहरण प्रकरणात संगमेश्वर पोलिसांनी शनिवारी ही कारवाई केली आहे.

कोव्हिड- १९ च्या पार्श्वभूमीवर असलेले निर्बंध शिथील केल्यानंतर अलीकडील कालावधीत चोरी व घरफोडी असे गुन्हे घडत असल्याचं निदर्शनास आलं. या पार्श्वभूमीवर दि. १६ सप्टेंबर रोजी गुरुवारी पोलीस अधीक्षक डॉ. मोहितकुमार गर्ग यांनी स्थानिक गुन्हे अन्वेषण शाखेच्या अधिकारी आणि अंमलदारांची बैठक घेवून गुन्ह्यांचा आढावा घेऊन आवश्यक त्या सूचना केल्या होत्या.

या पार्श्वभूमीवर शुक्रवारी स्थानिक गुन्हे अन्वेषण शाखेचे पो. उपनि संदिप वांगणेकर, पोलीस हवालदार सागर साळवी, विजय आंबेकर, नाईक उत्तम सासवे, भारकर घोडगा हे चिपळूण शहर परिसरात गस्त करत असताना सायंकाळी सुमारे पाच वाजण्याच्या सुमारास चिपळूण डी.बी.जे. कॉलेज समोरील रोडवर एक इसम संशयास्पद स्थितीत दिसून आला. त्या इसमाकडे शिताफीने चौकशी केली असता, त्याने त्याचे नाव राकेश रमेश चव्हाण, वय ३६ वर्षे, रा. कळंबुशी, खाचरवाडी, ता. संगमेश्वर, जि. रत्नागिरी असं असल्याचं सांगितलं. अधिक चौकशीत या व्यक्तीने २० सप्टेंबर रोजी बुरंबाड, ता. संगमेश्वर येथे एका अल्पवयीन मुलीची छेड काढून तिला पळवून नेण्याचा प्रयत्न केल्याचं आणि त्यावेळी वापरलेली मोटर सायकल क्र. एमएच-०८ एआर-३९६५ ही शृंगारतळी, ता. गुहागर येथून चोरी केली असल्याची धक्कादायक माहिती समोर आली.

यावेळी पोलीस गस्ती पथकाने त्याच्याकडे असलेल्या बॅगेची तपासणी केली असता रोख रक्कम, दोन मोबाईल व अन्य साहित्य असे एकूण २२ हजार २७० रुपये किमतीचा ऐवज मिळाला. यामध्ये दोन मोबाईल होते. मोबाईलबाबत तो समाधानकारक उत्तर देऊ शकला नाही. त्यानंतर हा सगळा धक्कादायक प्रकार समोर आला. त्यामुळे पोलीस नाईक उत्तम सासवे यांच्या फिर्यादीवरुन चिपळुण पोलीस ठाणे येथे कलम १२४ महाराष्ट्र पोलीस अधिनियम प्रमाणे गुन्हा दाखल करण्यात आला.

याप्रकरणी पोलीस हवालदार सुकन्या आंबेरकर यांनी संशयित आरोपी राकेश रमेश चव्हाण याला शनिवारी चिपळूण न्यायालयात हजर केलं, त्यावेळी त्याला वैयक्तिक जामीनावर मुक्त करण्यात आलं आहे.

दरम्यान, सदर संशयित तरुणाला आता संगमेश्वर पोलीस ठाण्याचे सहाय्यक पोलीस निरीक्षक प्रविण देशमुख यांच्या पथकाने ताब्यात घेतलं आहे. तसंच संशयित आरोपीला अल्पवयीन मुलीच्या अपहरणाबाबत संगमेश्वर पोलीस ठाणे येथे दाखल गुन्ह्यात अटक करण्यात आली आहे. त्याला २६ सप्टेंबर रोजी न्यायालयासमोर हजर करण्यात येणार आहे. सदर गुन्ह्याचा तपास पोलीस उपनिरीक्षक पुजा चव्हाण करत आहेत. स्थानिक गुन्हे अन्वेषण शाखेच्या अधिकारी व अंमलदारांनी केलेल्या कामगिरीबाबत पोलीस अधीक्षक डॉ. मोहितकुमार गर्ग यांनी पथकाचं अभिनंदन केलं आहे.