पुण्यातील बुधवार पेठ परिसरात ९० ते १०० वर्षे जुना सिंगालिया वाडा आहे. या वाड्याचा साधारण ७५ टक्के भाग आज सकाळी सव्वा सातच्या सुमारास कोसळला. यात दोघे जण अडकले होते. त्यात एक ७० वर्षीय वृद्ध महिला देखील होती. या घटनेची माहिती अग्निशमन दलाला देण्यात आली. अग्निशमन कर्मचारी यंत्रणेसह घटनास्थळी पोहोचले. त्यांनी अडकलेल्या वृद्ध महिलेसह आणखी एका जखमी व्यक्तीला सुखरूप बाहेर काढले.
आम्हाला दूरध्वनीवरून माहिती मिळताच, अग्निशमन दलाचे अधिकारी आणि कर्मचारी लगेच घटनास्थळी पोहोचले. पहिल्या मजल्यावरील एकाच कुटुंबातील दोघे जण ढिगाऱ्याखाली अडकल्याचे समजले. गंगुबाई कल्याणी (वय ७०) आणि विनायक कल्याणी (वय ४८) यांना अग्निशमन दलाच्या जवानांनी बाहेर काढले आणि त्यांना रुग्णालयात दाखल केले, अशी माहिती अग्निशमन अधिकारी प्रदीप खेडेकर यांनी ‘पीटीआय’ला दिली. ढिगारा हटवण्याचे काम सुरू आहे, अशी माहितीही त्यांनी दिली.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
