मुंबईत विधवा महिलेला ३२ लाखांना लुटलं, गुंतवणुकीचा ‘असा’ मार्ग सुचवला आणि… – in investment widow robbed of rs 32 lakh in mumbai

मुंबई: करोनाच्या भीषण काळात सगळंच काही सध्या ऑनलाइन सुरू आहे. त्यामुळे पैशांची हेराफेरी देखील तितकीच वाढली आहे. ऑनलाईन पद्धतीने व्यवहार वाढल्यामुळे मोठ्या प्रमाणात फसवणुकीचे प्रकारही वाढले आहेत. असाच एक धक्कादायक प्रकार मुंबईच्या मिरारोड इथं समोर आला आहे. एका विधवा महिलेला म्युचअल फंडमध्ये गुंतवणूक करून देतो असं सांगत तब्बल ३२ लाख ४६ हजारांचा गंडा घातल्याचं समोर आलं आहे.

या प्रकरणी पीडित महिलेने मिरारोड इथल्या नया नगर पोलीस ठाण्यात गुन्हा दाखल केला असून पुढील तपास सुरू असल्याची माहिती देण्यात आली आहे. सगळ्यात धक्कादायक बाब म्हणजे या विधवा महिलेने आपल्या दोन मुलींच्या लग्नासाठी आणि त्यांच्या शिक्षणासाठी ही बचत केली होती. परंतु हाच पैसा लुटला गेल्यामुळे आता त्यांच्यावर मोठं आर्थिक संकट कोसळलं आहे. या घटनेमुळे संपूर्ण परिसरात खळबळ उडाली असून नागरिकांमध्येही भीतीचं वातावरण आहे.

तुळजाभवानी मंदिरात VIP दर्शन मिळणार नाही, संस्थानाने जारी केली नवी नियमावली
मिळालेल्या माहितीनुसार, सावित्री कोयारी असं फिर्यादी महिलेचं नावे असून मातेश्वरी गिरी असं आरोपीचं नाव आहे. आरोपीने फिर्यादीकडून म्युचअल फंडमध्ये गुंतवणूक करण्याच्या नावाखाली ५१ लाख ५० हजार रुपये घेतले. पण त्याने कोणतीच गुंतवणूक केली नाही आणि हे पैसे घेऊन फरार झाला. सावित्री यांनी गुंतवणूक केलेली रक्कम आरोपीकडे मागण्याचा अनेकदा प्रयत्न केला. पण त्याने टोलवाटोलवीची उत्तरे देत पैसे देणे टाळलं.

अखेर पैशांसाठी सारखा तगादा लावल्यानंतर थोडी थोडी करत रक्कम परत केली. पण उर्वरित ३२ लाख ४६ हजार रुपये मात्र त्याने दिले नाहीत. आपली फसवणूक झाल्याचे लक्षात येताच सावित्री यांनी पोलीस ठाण्यात धाव घेतली आणि घटनेचा उलगडा झाला. पोलीस सध्या या प्रकरणाचा तपास करत असल्याची माहिती आहे.
राज्यात कोळसाटंचाईचे संकट; माजी उर्जामंत्र्यांनी केला ‘हा’ आरोप