कोल्हापूरचा शाही दसरा उत्साहात; करवीरकरांनी लुटले दसऱ्याचे सोने! – royal dussehra of kolhapur latest updates

कोल्हापूर : करोनाचे निर्बंध पाळून निमंत्रित करवीरकरांनी ऐतिहासिक दसरा चौकात श्रीमंत शाहू छत्रपती आणि राजघराण्यातील सदस्यांनी शमी पूजन केल्यावर अपूर्व उत्साहात दसऱ्याचे सोने लुटले. श्रीमंत शाहू महाराज, खासदार संभाजीराजे छत्रपती, श्रीमंत युवराज मालोजीराजे, शहाजी राजे, यश राजे यांना आपट्याची पाने देऊन करवीरकर जनतेने शाही दसऱ्याच्या शुभेच्छा दिल्या. हा सोहळा पाहण्यासाठी सरदार, इनामदार घराण्यातील प्रमुख मानकऱ्यांसह राजकीय नेते, सरकारी अधिकारी उपस्थित होते. सर्वसामान्यांसाठी दसरा सोहळा पाहण्यासाठी चौकाचौकात स्क्रीन आणि ऑनलाईनद्वारे सोय केली होती.

करोनामुळे गतवर्षी दसरा सोहळा रद्द करुन जुना राजवाड्यात छोट्या पद्धतीने तो सोहळा करण्यात आला होता. यंदा करोनाची साथ कमी झाल्याने दसरा चौकात शाही दसरा सोहळा होणार अशी घोषणा शाहू महाराजांनी केली होती. तरीही प्रशासनाने करोनासंदर्भात सर्व नियमांचा अवलंब करताना निमंत्रितांना फक्त दसरा चौकात प्रवेश दिला. चौकात येणारे सर्व रस्ते बॅरिकेटस् लावून अडवले होते. शुक्रवारी सायंकाळी साडेपाच वाजण्याच्या सुमारास करवीर निवासिनी अंबाबाई, जुना राजवाड्यातील तुळजाभवानी, गुरु महाराज वाड्यातील सिद्धेश्वर महाराज या मानाच्या तीन पालख्यांचे दसरा चौकात आगमन झाले. यावेळी पांढऱ्या व लाल रंगाच्या शामियानात सरदार, मनसबदारासह लोकप्रतिनिधी, वरिष्ठ सरकारी अधिकारी आणि मान्यवर उपस्थित होते.

‘हिंमत असेल तर सरकार पाडून दाखवा’, उद्धव ठाकरेंचं भाजपला थेट आव्हान

सायंकाळी ५.४५ च्या सुमारास न्यू पॅलेस येथून शहर वाहतूक नियंत्रण शाखेच्या मोटारसायकलीच्या ताफ्यासह मेबॅक मोटारीतून श्रीमंत शाहू छत्रपती महाराज, खासदार श्रीमंत युवराज संभाजीराजे, युवराज मालोजीराजे, शहाजीराजे, यशराजे यशस्विनीराजे यांचे आगमन झाले. टाळ्यांच्या कडकडाटात त्यांचे स्वागत करण्यात आले. भालदारांनी ललकारी दिली. पोलीस बँडच्या तालावर करवीर संस्थानचे गीत झाले. सरदार, मानकऱ्यांचे मुजरे घेत शाहू महाराजांसह राजघराण्यातील सदस्य स्थानापन्न झाले. दसरा महोत्सव समितीच्या वतीने राजघराण्यातील सदस्यांचे स्वागत करण्यात आले. त्यानंतर राजपुरोहित दादर्णे यांच्या पौरोहित्याखाली शमी पूजनाचा विधी झाला. त्यानंतर राजघराण्याने सोने लुटताच ठासणीच्या बंदुकीच्या फैरीने सोने लुटल्याची वर्दी दिली आणि निमंत्रितांनी सोने लुटले. लुटलेले सोने घेऊन राजघराण्यातील सदस्यांना देऊन दसऱ्याच्या शुभेच्छा देण्यात आल्या.

दरम्यान, या सोहळ्यास त्रिपुराचे माजी राज्यपाल डॉ. डी. वाय. पाटील, पालकमंत्री सतेज पाटील, ग्रामविकासमंत्री हसन मुश्रीफ, खासदार संजय मंडलिक, आमदार चंद्रकांत जाधव, शाहू साखर कारखान्याचे अध्यक्ष समरजितसिंग घाटगे, कुलगुरू डॉ. डी. टी. शिर्के, डी वाय पाटील विद्यापीठाचे कुलपती संजय डी. पाटील, आमदार जयंत आसगावकर, आमदार चंद्रकांत जाधव ,जिल्हा पोलीस प्रमुख शैलेश बलकवडे, महापालिकेच्या प्रशासक कादंबरी बलकवडे, जिल्हा परिषदेचे अध्यक्ष राहुल पाटील, राष्ट्रवादीचे शहराध्यक्ष आर. के .पोवार , काँग्रेसचे शहराध्यक्ष सचिन चव्हाण, भाजपचे शहराध्यक्ष राहुल चिकोडे उपस्थित होते.