attack on Hindu Temple in Bangladesh: बांगलादेशचे गृहमंत्री म्हणाले, ‘दुर्गा पूजा मंडपावर हल्ले हा सुनियोजित कट’ – attacks during durga puja was pre-planned says bangladesh home minister

ढाका: बांगलादेशमध्ये नवरात्रौत्सवात दुर्गा पूजा मंडपांवर काही धर्मांधांनी कथित ईशनिंदेच्या मुद्यावर हल्ला केला होता. त्याशिवाय इतरही काही ठिकाणी हिंदू मंदिरांवरही हल्ले करण्यात आले होते. हे हल्ले सुनियोजित कट असल्याचे बांगलादेशचे गृहमंत्री असदुज्जमां खान कमाल यांनी म्हटले आहे. कोमिल्लामध्ये झालेली घटना सरकारने गांभीर्याने घेतली असल्याचे त्यांनी म्हटले. दुर्गा पूजा मंडपावर, मंदिरांवर हल्ले म्हणजे बांगलादेशमधील धार्मिक सलोखा बिघडवण्याचा प्रयत्न असल्याचे त्यांनी म्हटले.

बांगलादेशचे गृहमंत्री असदुज्जमां खान कमाल यांनी म्हटले की, ही घटना फक्त कोमिल्लामध्येच घडली नाही. रामू, नासिर नगरमध्येही अशीच घटना घडली. अशा प्रकारचे हल्ले करण्यामागे देशात तणाव निर्माण करून अराजकतेचे वातावरण तयार करण्याचा उद्देश्य होता.

बांगलादेशात हिंदू मंदिरांवर धर्मांधांचा हल्ला; पंतप्रधानांकडून निषेध, कठोर कारवाईचे आश्वासन
असदुज्जमां कमाल यांनी पुढे म्हटले की, आमचे देशवासिय धर्मांध नाही, आम्ही कधीही या ठिकाणी दहशतवादी वातावरण निर्माण होऊ दिले नाही. हिंदू, मुस्लिम, शीख व इतर घटकांनी मिळून दहशतवादी घटना आणि कृत्यांचा सामना केला आहे. कोमिल्लानंतरही विविध ठिकाणी हिंदू मंदिर, दुर्गा पूजा मंडपांवर हल्ले झाले. नौखाली आणि चांदपूरमध्ये चारजणांचा मृत्यू झाला. फेनी आणि कोक्सबाझारमध्येही हल्ले झाले.

बांगलादेशमध्ये धर्मांधांचा उच्छाद; इस्कॉन मंदिरावर हल्ला, एका भाविकाची हत्या
बांगलादेशच्या गृहमंत्र्यांनी या हल्ल्यासाठी शोक व्यक्त केला. हे हल्ले म्हणजे बांगलादेशमधील विविध धार्मिक समूहांमध्ये फूट पाडण्याचा प्रयत्न असून सुनियोजित कट रचून हे हल्ले करण्यात आल्याचे त्यांनी म्हटले.

दरम्यान, कोमिल्ला येथील दुर्गा पूजा मंडपांवर हल्ला झाल्यानंतर बांगलादेशच्या पंतप्रधान शेख हसीना यांनी दोषींवर कठोर कारवाई करणार असल्याचे म्हटले होते. हा हल्ला करणारे कोणत्याही धर्माचे असोत, त्यांना शिक्षा होणार असल्याचे त्यांनी म्हटले.