हायलाइट्स:

  • गांजाची शेती करणाऱ्या चौघांच्या मुसक्या आवळल्या
  • ११ लाख ६३ हजार रूपयांचा मुद्देमाल जप्त
  • अमली पदार्थ विरोधी पथकाची कारवाई

पुणे : पौडजवळील अंबरवेट परिसरात गांजाची शेती करणाऱ्या चौघांच्या मुसक्या अमली पदार्थ विरोधी पथकाने आवळल्या आहेत. आरोपींकडून गांजाची २५० झाडे, १८ किलो गांजा व इतर असा ११ लाख ६३ हजार रूपयांचा मुद्देमाल जप्त केला आहे. शहरात गांजा विक्री करणाऱ्यांना पकडल्यानंतर त्यांच्याकडून मिळालेल्या माहितीवरून ही कारवाई करण्यात आली.

चेतन मारूती मोहोळ (वय २७, रा. कानिफनाथ सोसायटी, कोथरूड), साहेबा हुल्लाप्पा म्हेत्रे (वय २०, रा. कोथरूड), प्रकाश वाघोजी खेडेकर (वय ३५) आणि इंदुबाई वाघोजी खेडेकर (वय ६५, रा. दोघेही- गवळीवाड़ा, अंबरवेट, पौड) अशी अटक केलेल्यांची नावे आहेत. अमली पदार्थ विरोधी पथकाने मोहोळ व म्हेत्रे याला शुक्रवारी कोथरूड पोलीस ठाण्याच्या हद्दीत संशयावरून गांजा विक्री करताना अटक केली होती. त्यांच्याकडून ५८० ग्रॅम गांजा मिळाला होता. याप्रकरणी कोथरूड पोलीस ठाण्यात गुन्हा दाखल करून त्यांच्याकडे चौकशी केली. त्यावेळी त्यांनी पौड परिसरातील अंबरवेट येथून गांजा आणल्याचं सांगितलं.

Ujjwal Nikam मलिक-वानखेडे वाद: उज्ज्वल निकम यांनी दिला ‘हा’ धोक्याचा इशारा

गुन्हे शाखेचे अतिरिक्त आयुक्त रामनाथ पोकळे यांच्या मार्गदर्शनाखाली पोलीस निरीक्षक विनायक गायकवाड आणि प्रकाश खांडेकर यांच्या पथकाने अंबरवेट येथे जाऊन प्रकाश खेडेकर याच्या घरी तहसीलदार यांच्या उपस्थितीमध्ये घराची झडती घेतली. त्यावेळी घरात १८ किलो ९९५ ग्रॅम ओलसर हिरवट, काळसर बोंडे, फांद्या आणि पाने मिळाली. या ठिकाणाहून खेडेकर दाम्पत्याला पकडून चौकशी केली. त्यावेळी घराजवळील जागेत गांजाची शेती केली असल्याचं आढळून आलं. त्या ठिकाणी पोलिसांना २५० तयार गांजाची झाडे आढळून आली आणि पोलिसांनी १५४ किलो गांजा जप्त केला.

दरम्यान, आरोपी इंदुबाई ही प्रकाशची आई आहे. ती काही वर्षापासून गांजाची झाडे लावून मिळेल त्या किंमतीत ती विक्री करत असल्याचं समोर आलं आहे. या वर्षी जून महिन्यात त्यांनी ही झाडे लावली होती. प्रकाश याला दोन भाऊ असून ते वेगळे राहतात. आई ही त्याच्याकडे असते. प्रकाश याचे लग्न झाले असून त्याला तीन मुले आहेत. तो अशिक्षित आहे. या आरोपींना कोर्टात हजर केले असता २६ ऑक्टोंबरपर्यंत पोलीस कोठडीत ठेवण्याचा आदेश देण्यात आला आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here