महाराष्ट्रात करोनाचे दोन रुग्ण आढळले, पुण्यात उपचार

पुणेः पुण्यातील दोघे पती पत्नी हे २० ते २९ फेब्रुवारी दरम्यान दुबईला गेले होते.१ मार्चला पुण्यात परतले. त्यांना दोन दिवसांपासून सर्दी, ताप, खोकला अशी लक्षणे दिसत होती. त्यामुळे सोमवारी दुपारी ते दोघेही नायडू रुग्णालयात दाखल झाले. त्यांना स्वतंत्र वॉर्डमध्ये ठेवण्यात आले. त्यांच्या घशातील द्रवाचे नमुने एनआयव्हीला तपासणीसाठी पाठविण्यात आले. त्यात त्या दोघांना करोना या विषाणूची लागण झाल्याचे निदान झाले. हे दोघे रुग्ण पुण्यातील रहिवासी आहेत. ते ४९ आणि ५१ वर्षांचे आहेत. हे दोघे महाराष्ट्रातील पहिले पॉझिटिव्ह पेशन्ट असल्याचे आरोग्य खात्याचे राज्य रोग सर्वेक्षण अधिकारी डॉ. प्रदीप आवटे यांनी मटाला सांगितले.

दुबईहून आलेल्या या दोन रुग्णांवर नायडू हॉस्पिटलमधील विलगीकरण कक्षात उपचार सुरू करण्यात आले आहे. या रुग्णांच्या संपर्कात आलेल्यांची माहिती घेण्यात येत आहे.

आरोग्य मंत्र्यांचे आवाहन

कोरोनाचे दोन संशयित रुग्ण पुणे येथे आढळून आले. दोघांवर उपचार सुरू झाले आहेत. त्यांची प्रकृती स्थिर आहे. नागरिकांनी घाबरून न जाता सतर्क रहावे, असे आवाहन आरोग्यमंत्री राजेश टोपे यांनी केले आहे. धुलिवंदनाचा सण साजरा करताना होणारी गर्दी नागरिकांनी टाळावी. सार्वजनिक आणि वैयक्तिक स्वच्छता पाळावी. खोकताना, शिंकताना नाका-तोंडावर रुमाल ठेवावा. मास्क ऐवजी तोंडाला रुमाल वापरावा,अशी सतर्कता बाळगावी, असे आवाहनही आरोग्यमंत्र्यांनी केले आहे.

दरम्यान, होळी, धुळवड, तुकाराम बीज तसेच गांवोगांव भरणाऱ्या यात्रा व ऊरुसांच्या पार्श्वभूमीवर गर्दीची ठिकाणे टाळण्याचे आवाहन प्रशासनाने केले आहे. होळी सण आपल्या कुटुंबीयांसोबतच साजरा करण्याचे आवाहन विभागीय आयुक्त डॉ. दिपक म्हैसेकर आणि पुण्याचे जिल्हाधिकारी नवल किशोर राम यांनी केले आहे. दरम्यान, विभागीय आयुक्त कार्यालयात प्रशासनाची तातडीची बैठक घेण्यात आलीय. यावेळी उपाययोजनावर भर दिला गेला.

करोनाच्या पार्श्वभूमीवर पुण्यातील अनेक आयटी कंपन्यांनी कर्मचाऱ्यांना घरून काम म्हणजे वर्क फ्रॉम होम करायला लावलं आहे. काळजी घेण्याचे आवाहन केलं आहे.