पुणे: ‘करोना’ व्हायरसच्या () पार्श्वभूमीवर भारतात अफवांना ऊत आला आहे. समाजमाध्यमांचा वापर करून दिशाभूल करणारे मेसेज फॉरवर्ड करण्याचं प्रमाण वाढलं आहे. सावित्रीबाई फुले पुणे विद्यापीठाला या अफवेचा मोठा फटका बसला आहे. विद्यापीठाच्या नावानं बनावट पत्रक जारी करून कुणीतरी विद्यापीठाच्या अखत्यारीतील महाविद्यालयांना परस्पर सुट्टी जाहीर केल्याचं समोर आलं आहे.

वाचा:

करोना विषाणूच्या प्रसाराच्या पार्श्वभूमीवर ‘सावित्रीबाई फुले पुणे विद्यापीठाने महाविद्यालयांना २० ते ३० मार्च दरम्यान सुट्टी जाहीर केली आहे’ अशा आशयाचा संदेश असलेले निवेदन सध्या सोशल मीडियावर फिरत आहे. याची माहिती विद्यापीठ प्रशासनानं तात्काळ याबाबत खुलासा करून अफवेचं खंडन केलं आहे. ‘हा संदेश चुकीचा आहे. संबंधित निवेदन विद्यापीठाने प्रसिद्ध केलेले नाही. ते कोणीतरी खोडसाळपणे तयार केले आहे. या प्रकारामुळे समाजात अफवा व घबराट पसरण्याचा धोका आहे. या प्रकरणाचे गांभीर्य लक्षात घेता याबाबत विद्यापीठाकडून योग्य ती कायदेशीर कारवाई करणात येणार आहे, असा इशाराही विद्यापीठ प्रशासनानं दिला आहे.

पुण्यात करोनाचे रुग्ण आढळल्यापासून चिंता वाढली आहे. त्याचाच फायदा घेऊन काही लोक अफवा पसरवत आहेत. अफवा पसरविणाऱ्यांवर कठोर कारवाई करण्याचा इशारा सरकारनं दिला आहे. मात्र, तरीही हे प्रकार सुरूच आहेत.

वाचा:

सॅनिटायझर्स, मास्क विक्रेत्यांकडून लूट

राज्यात आपत्ती व्यवस्थापन कायदा लागू झाला असला, तरी पुण्यात हँड सॅनिटायझर्स व मास्कचा तुटवडा निर्माण झाल्याचे चित्र निर्माण केले जात आहे. शहराच्या विविध उपनगरात ब्रँडेड हँड सॅनिटायझर्सचा तुटवडा असल्याचं सांगितलं जात आहे. अनेक दुकानांमध्ये पूर्वी कधीही न ऐकलेल्या ब्रँड्सचे सॅनिटायझर्स ग्राहकांच्या माथी मारले जात आहेत. तर काही दुकानांमध्ये आणखी शॉर्टेज होण्याची भीती दाखवून वाढीव दरानं विक्री केली जात आहे. वैद्यकीय मास्कचे दरही वाढले असून त्यासाठी २० ते ५० रुपये मोजावे लागत आहेत. जिल्हाधिकाऱ्यांनी असे प्रकार करणाऱ्यांवर कारवाईचा इशारा दिला आहे. ‘राज्यात आपत्ती व्यवस्थापन कायदा लागू झाला आहे. अशा परिस्थितीत काळाबाजार करणाऱ्या किंवा साठेबाजी करणाऱ्या व्यापाऱ्यांवर कडक कारवाई केली जाईल. त्यांच्याकडील माल जप्त केला जाईल. नागरिकांनी अशा व्यापाऱ्यांची माहिती जिल्हा प्रशासनाला कळवावी’, असे आवाहन जिल्हाधिकारी कार्यालयातर्फे करण्यात आले आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here