अहमदनगर: करोना व्हायरसा विळखा दिवसेंदिवस घट्ट होत असून आज नगरमध्ये करोनाची लागण झालेला एक रुग्ण आढळला आहे. त्यामुळं नगरमधील करोना बाधितांची संख्या दोन झाली असून महाराष्ट्रात हा आकडा ४८ पर्यंत पोहोचला आहे.

‘करोना’चं निदान झालेला हा रुग्ण तीन मार्चला दुबईहून आला होता. तो तालुक्यातील आहे. आज सकाळीच त्याच्या आरोग्य तपासणीचा अहवाल आला. तो पॉझिटिव्ह असल्याची माहिती जिल्हाधिकारी राहुल द्विवेदी यांनी दिली. या रुग्णाला आयसोलेशन वार्डमध्ये ठेवण्यात आले आहे.

दरम्यान, मुंबई आणि उल्हासनगरमध्ये करोनाचे आज आणखी दोन रुग्ण आढळले आहेत. यापैकी मुंबईतील २२ वर्षीय तरुणी ही ब्रिटनहून आली होती. तर, उल्हासनगरमधील ४९ वर्षीय महिला दुबईहून आली होती. या दोघींनाही आयसोलेशन वॉर्डमध्ये ठेवून त्यांच्यावर उपचार सुरू करण्यात आले आहेत.

मक्केला यात्रेसाठी गेलेले ३०३५ यात्रेकरू करोनामुळे अडकून पडले होते. त्यातील अखेरच्या तुकडीला भारतात आणण्यात येत असून या तुकडीला आणणाऱ्या पहिल्या विमानाने जेद्दाहून उड्डाण घेतले होते. थोड्यावेळापूर्वीच हे विमान मुंबईत दाखल झाले आहे. विशेष विमानाने आलेल्या या सर्व प्रवाशांची करोना टेस्ट होणार असून त्यांची टेस्ट पॉझिटिव्ह आल्यास त्यांना विलगीकरण कक्षात ठेवण्यात येणार असल्याचं सूत्रांनी सांगितलं.

गर्दी टाळणं हा करोना रोखण्याचा सर्वात प्रभावी उपाय असल्याचं समोर आलं आहे. त्यामुळं राज्यभरात त्या दृष्टीनं उपाययोजना केल्या जात आहेत. राज्य सरकारनं मॉल, शाळा, महाविद्यालय अशा गर्दीच्या ठिकाणं बंद ठेवण्याच्या सूचना दिल्या आहेत. तर, गावोगावच्या यात्रा रद्द करण्यात आल्या आहेत. मुंबईतील सिद्धिविनायक, शिर्डीतील साई मंदिरासह राज्यातील प्रमुख देवस्थानांनीही दर्शनासाठी मंदिरं बंद ठेवली आहेत.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here