पुरुषांचं वर्चस्व आहे; पण…
आपली मनोरंजनसृष्टी पुरुषप्रधान किंवा पुरुषांचं वर्चस्व असलेली आहे. ते मीसुद्धा अनुभवलं आहे. पण, आता काळानुरूप परिस्थिती नक्कीच बदलत आहे. अभिनेता किंवा अभिनेत्री यांना समान वागणूक दिली पाहिजे. हेच पडद्यामागील कर्मचारी, तांत्रिक बाजू सांभाळणारे यांनाही लागू होतं. आपण स्वतः आपल्यासाठी उभं राहिलं पाहिजे. जेव्हा जेव्हा असा भेदभाव होताना मी बघितलंय तेव्हा तेव्हा मी स्पष्टपणे बोलले आहे.
काम करताना दडपण” सिनेमात मी शाहिद कपूरच्या पत्नीची भूमिका साकारतेय. त्याच्याबरोबर काम करताना थोडं दडपण होतं. त्याच्याकडून बरंच काही शिकायला मिळालं. तो आपल्या सहकलाकाराला समजून घेतो, मोकळीक देतो. सिनेमात एका सीनमध्ये मला शाहिदला कानाखाली मारायची होती. सुरुवातीला घाबरून मी त्याला मारलं. पण, दिग्दर्शकाला तो सीन योग्य वाटला नाही. त्या प्रसंगाचे दोन-तीन नव्हे तर सहा टेक झाले. पण, शाहिद मला म्हणाला की, असा विचार कर की समोर एक नावडती व्यक्ती उभी आहे आणि तू त्याला थोबाडीत मारतेयस. त्यानंतर तो सीन अपेक्षेप्रमाणे चित्रित झाला. सिनेमातील माझी भूमिका एका तेलुगू मुलीची आहे. मी मराठी आहे, सिनेमा हिंदी आणि भूमिकेला तेलुगू टच; त्यामुळे या सिनेमाचा संपूर्ण प्रवास स्मंरणीय आणि आव्हानात्मक होता.
एकाच नाण्याच्या दोन बाजूमाझी मध्यवर्ती भूमिका असलेले ‘तुफान’, ‘धमाका’ हे सिनेमे ओटीटीवर प्रदर्शित झाले. हे सिनेमे मोठ्या पडद्यासाठी बनवले गेले असले; तरी ओटीटीच्या निमित्तानं ते एकाच वेळी जगभरातील प्रेक्षकांपर्यंत पोहोचले. ‘धमाका’ सिनेमातील माझी भूमिका लांबीनं छोटी आहे; परंतु त्यासाठी मला मिळालेला प्रतिसाद तुलनेनं मोठा आहे. ‘जर्सी’ हा चित्रपट सिनेमागृहात प्रदर्शित होणार आहे. आजच्या तारखेला ‘ओटीटी’ आणि ‘सिनेमागृह’ या एकाच नाण्याच्या दोन बाजू आहेत. सिनेमा प्रेक्षकांपर्यंत ताकदीनं पोहोचतोय; हे अत्यंत महत्त्वाचं आहे. ओटीटीच्या निमित्तानं अनेक नवोदित कलाकारांना प्रसिद्धी आणि चेहरा मिळाला आहे. ओटीटीमुळे तळागाळातील चांगलं काम आपल्यासमोर येतंय. त्यामुळे सिनेमागृह आणि ओटीटी ही दोन्ही माध्यमं सिनेमांसाठी महत्त्वपूर्ण आहेत.
सगळीकडे काम करायचं आहेमराठी सिनेमांसाठी विचारणा होतेय. पण, अपेक्षित अशी संहिता अद्याप माझ्या हाती लागलेली नाही. या ‘मुंटा’च्या मुलाखतीच्या निमित्तानं मी सर्व मराठी दिग्दर्शक, लेखक, निर्माते यांना सांगू इच्छिते की, मी आज बॉलिवूडमध्ये आलीय म्हणजे मराठी सिनेमे करणार नाही; असं काहीही नाही. चांगली संहिता असेल तर मी मराठी सिनेमे नक्कीन करेन. मराठी, हिंदी, इंग्रजी आणि दाक्षिणात्य भाषा; सगळीकडे मला काम करायचं आहे.
