हायलाइट्स:

  • ‘फुलराणी…’ सिनेमा दिवाळीमध्ये प्रदर्शित होणार
  • विश्वास जोशी यांचे दिग्दर्शन, सूबोध भावेची प्रमुख भूमिका
  • जॉर्ज बर्नाड शॉ यांच्या पिग्मॅलिअन कलाकृतीवर आधारीत सिनेमा

मुंबई : प्रसिद्ध लेखक जॉर्ज बर्नाड शॉ यांच्या ‘पिग्मॅलिअन’ वर आधारित असलेला ‘माय फेअर लेडी’ हा संगीतमय सिनेमा खूपच गाजला होता. या कलाकृतीवर आधारीत असलेला ‘फुलराणी….अविस्मरणीय प्रेमकहाणी’ हा मराठी सिनेमा येत्या दिवाळीत प्रेक्षकांच्या भेटीला येणार आहे. या सिनेमातून एक अनोखी फुलराणी प्रेक्षकांना पाहायला मिळणार आहे. या सिनेमाचं दिग्दर्शन विश्वास जोशी करत आहेत.

प्रेक्षकांनी नाटकातील फुलराणीवर भरभरून प्रेम केलं असून आता प्रेक्षक सिनेमातील या फुलराणीला कसा प्रतिसाद देतात, याची उत्सुकता आहे. ‘फुलराणी…अविस्मरणीय प्रेमकहाणी’ या सिनेमामध्ये फुलराणी कोण साकारणार याची प्रेक्षकांना खूपच उत्सुकता असून निर्मात्यांनी ते नावगुलदस्त्यात ठेवले आहे. येत्या दिवाळीत या ‘फुलराणी’ राज्यातील सिनेमागृहांत दरवळणार आहे.

फुलराणी

सुबोध भावेची आणखी एक रोमँटिक भूमिका!

तिकीट खिडकीवर तुफान यशस्वी ठरलेल्या ‘नटसम्राट’, ‘What’s up लग्न’ या सिनेमांनंतर विश्वास जोशी दिग्दर्शित करत असलेल्या ‘फुलराणी’ सिनेमाकडूनही प्रेक्षकांना मोठी अपेक्षा आहे. अतिशय वेगळ्या आणि नव्या रूपातील ‘फुलराणी’ प्रेक्षकांना या सिनेमातून पाहायला मिळणार आहे. यातील ‘विक्रम राजाध्यक्ष’ ही मुख्य भूमिका प्रसिद्ध अभिनेता सुबोध भावे साकारणार आहे. चित्रपटातील इतर कलाकारांची नावे अद्याप गुलदस्त्यात असली तरी प्रेमाचा अविस्मरणीय अविष्कार या चित्रपटाच्या निमित्ताने प्रेक्षकांना बघायला मिळेल, असा विश्वास दिग्दर्शक विश्वास जोशी व्यक्त करतात.


करोना काळात पूर्ण केलं चित्रीकरण

करोनामुळे दोन वर्ष मनोरंजन विश्वातील सर्व व्यवहार बंद होते. हळूहळू करोनाचा प्रादुर्भाव कमी झाल्यामुळे मनोरंजन विश्वावर घातलेलं निर्बंध काही शिथील करण्यात आले होते. त्याचवेळी संपूर्ण काळजी घेत ‘फुलराणी’ या सिनेमाचे चित्रीकरण पूर्ण करण्यात आले.

इंग्रजी कलाकृतीवर आधारित सिनेमा

विश्वास जोशी दिग्दर्शित चित्रपट ‘फुलराणी… अविस्मरणीय प्रेमकहाणी’ हा प्रसिद्ध लेखक जॉर्ज बर्नाड शॉ यांच्या ‘पिग्मॅलिअन’ या कलाकृतीने प्रेरित आहे. या चित्रपटाला प्रियंका बर्वे, आनंदी जोशी, शरयू दाते, निलेश मोहरीर, स्वप्नील बांदोडकर, वैशाली सामंत, हृषीकेश रानडे अशी गायक आणि संगीतकरांची तगडी फौज लाभली आहे. तर, सिनेमातील गीते गुरू ठाकूर यांनी लिहिली आहेत. फिनक्राफ्ट मिडिया प्रोडक्शन या सिनेमाचे प्रस्तुतकर्ते असून चित्रपटाची निर्मीती जाई विश्वास जोशी आणि अमृता अरुण राव यांनी केली आहे. या नव्या कलाकृतीचे लेखन विश्वास जोशी व गुरू ठाकूर यांनी केले आहे.

LEAVE A REPLY

Please enter your comment!
Please enter your name here