जिल्ह्यातील करोनाबाधितांच्या संख्येत गेल्या चार दिवसांपासून वाढ होत आहे. नववर्षाच्या तिसऱ्या दिवशी सोमवारी जिल्ह्यात तब्बल १३३ नव्या बाधितांची नोंद करण्यात आली. यात चार ओमिक्रॉन बाधितांचा समावेश आहे. त्यामुळे शहरात आतापर्यंत १० ओमिक्रॉन बाधितांची नोंद झाली आहे. वर्षाच्या अखेरच्या दिवशी शुक्रवारी ८१ तर, रविवारी ९० बाधित होते. सहा महिन्यांहून अधिक कालावधीनंतर जिल्ह्यात दिवसभरात तिहेरी संख्येत बाधितांची नोंद झाली आहे.
वाचाः
मागील सहा महिन्यातील नागपुरातील ही सर्वाधिक रुग्णसंख्या आहे. त्यामुळं राज्याच्या उपराजधानीत चिंता वाढली आहे. आज नागपुरात १३ जणांनी करोनावर मात केली आहे. दिलासादायक बाब म्हणजे, गेल्या २४ तासांत करोनामुळं एकाही रुग्णाचा मृत्यू झालेला नाही.
आज नागपुर जिल्ह्यात सापडलेल्या एकूण १३३ रुग्णांपैकी १०५ रुग्ण हे शहरात सापडले आहेत. तर, २० रुग्ण हे ग्रामीण भागातील आहे. तर, आठ रुग्ण हे जिल्ह्याबाहेरील आहेत. त्यामुळं जिल्ह्यातील एकूण रुग्णांची संख्या ४ लाख ९४ हजार ३२६ इतकी झाली आहे. तर, ४ लाख ८३ हजार ६७७ जणांनी करोनावर यशस्वी मात केली असून आजपर्यंत जिल्ह्यात १० हजार १२३ जणांचा मृत्यू झाला आहे.
वाचाः
प्रशासनाचा हायअलर्ट
देशात ओमायक्रॉन व्हेरिएंटचा वाढता धोका लक्षात घेता नागपूर महापालिकेने हा संसर्ग होऊ नये, यासाठी कठोर पावले उचलली आहेत. विदेशातून विमान अथवा कुठल्याही मार्गाने शहरात दाखल होणाऱ्या नागरिकांची करोना चाचणी अनिवार्य करण्यात आली आहे. मनपातर्फे डॉ. बाबासाहेब आंबेडकर आंतरराष्ट्रीय विमानतळावर विदेशातून येणाऱ्या प्रत्येक प्रवाशाची आरटीपीसीआर चाचणी केली जात आहे. सर्व विदेशी प्रवाशांची चाचणी विमानतळावरच करा, असे निर्देश मनपा आयुक्त राधाकृष्णन बी. यांनी दिले. ज्या प्रवाशांचा करोना अहवाल पॉझिटिव्ह येईल, त्यांना संस्थात्मक विलगीकरणात पाठविण्यात यावे, अशाही सूचना आयुक्तांनी दिल्या. प्रवाशांच्या संस्थात्मक विलगीकरणाची व्यवस्था मनपातर्फे सिव्हिल लाइन्स येथील आमदार निवास येथे करण्यात आली आहे. तसेच ज्यांना हॉटेलमध्ये राहायचे आहे, त्यांना हॉटेल अल-झम-झम आणि हॉटेल ओरिएंटल येथे स्वखर्चाने विलगीकरणात राहता येते, असे प्रशासनाकडून कळविण्यात आले.
