आरोपी विद्यार्थ्याला छायाचित्र काढण्याची हौस आहे. यासाठी त्याला कॅमेरा घ्यायचा होता. मात्र पैशांची चणचण असल्याने त्याने बँकेतच लुटपाट करण्याचा कट आखला. शुक्रवारी दुपारी १२ वाजताच्या सुमारास तो वैशालीनगर परिसरातील एसबीआयच्या शाखेत गेला. पैसे काढण्याच्या बहाण्याने तो काऊंटरसमोर रांगेत उभा राहिला. बँकेतील सफाई कर्मचाऱ्याच्या गळ्याला चाकू लावला. ‘तुमच्याकडे असलेली कॅश बॅगमध्ये द्या,’ असे त्याने काऊंटरवरील महिला कर्मचाऱ्याला धमकावले. तसेच बाजूच्या काऊंटरवरील अन्य कर्मचाऱ्याकडूनही त्यानं पैसे घेतले. दोन्ही मिळून एक लाख १३ हजार ९६० रुपये बँगमध्ये टाकून तो पसार झाला. बँकेतील कर्मचाऱ्यांनी आरडाओरड केली. याच भागात तैनात पोलिसांना तो पळताना दिसला. त्यांनी पाठलाग करून आरोपीला पकडले. रोख जप्त करुन त्याला अटक केली. पाचपावली पोलिस ठाण्याचे वरिष्ठ पोलिस निरीक्षक किशोर नगराळे यांच्या मार्गदर्शनाखाली पाचपावली पोलिसांनी शनिवारी आरोपीला न्यायालयात हजर केले. न्यायालयाने त्याची ३० मार्चपर्यंत पोलिस कोठडीत रवानगी केली.
बॅगमध्ये आढळले केवळ ९० हजार रुपये
आरोपीनं एक लाख १३ हजारांची रोख लुटल्याचे बँकेच्या कर्मचाऱ्यानं तक्रारीत म्हटले आहे. पाचपावली पोलिसांनी पाठलाग करुन त्याला तात्काळ पकडले. बॅगमध्ये केवळ ८९ हजार ६०० रुपयांची रोख आढळली. त्यामुळे या विद्यार्थ्यानं नेमकी किती रक्कम लुटली. लुटपाटीचा आकडा फुगवून का सांगण्यात आला? याचा तपास पाचपावली पोलिस करीत आहेत.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
