Marathi Boards On Shops Shivsena Distrubute Reminder Letter In Mumbai | Marathi Boards on Shops: शिवसैनिक अ‍ॅक्शन मोडमध्ये, मराठी पाट्या लावण्यासाठी दुकानदारांना स्मरणपत्रांचं वाटप | Maharashtra Times

मुंबई : महाराष्ट्रातील दुकानांवर ठळक आणि मोठ्या अक्षरात मराठी पाट्या लावण्याच्या राज्य मंत्रिमंडळाच्या निर्णयानंतर मुंबईत शिवसैनिक अ‍ॅक्शन मोडमध्ये आले आहेत. राज्य मंत्रिमंडळाच्या निर्णयाच्या दुसऱ्याच दिवशी शिवसैनिकांनी रस्त्यावर उतरुन दुकानदारांना यासंबंधी सूचना द्यायला सुरुवात केली आहे. मुंबईच्या विलेपार्ले परिसरात गुरुवारी शिवसैनिकांकडून दुकानदारांना स्मरणपत्रे वाटण्यात आली. या माध्यमातून दुकानांवर मराठी पाट्या लावण्याची आठवण व्यापाऱ्यांना करुन देण्यात आली. आता मुंबईसह राज्याच्या इतर भागांमध्येही शिवसेना असाच उपक्रम राबवणार का, हे पाहावे लागेल. शिवसेना बऱ्याच दिवसांनी मराठीच्या मुद्द्यावरुन अशाप्रकारे रस्त्यावर उतरली आहे. त्यामुळे आता यावर मनसेची प्रतिक्रिया काय असणार, हे पाहावे लागेल.
Marathi boards on shops: दुकानाच्या पाटीवर मोठ्या अक्षरात मराठीत नाव लिहायचे की नाही हे आम्ही ठरवू: विरेन शाह
राज्यातील दुकाने आणि आस्थापनांवर ठळक अक्षरात मराठी पाटया लावण्याच्या मंत्रिमंडळाच्या निर्णयामुळे महाराष्ट्रातील राजकारण चांगलेच तापले आहे. आगामी महानगरपालिका निवडणुकांच्या पार्श्वभूमीवर या निर्णयाचे श्रेय घेण्यासाठी शिवसेना आणि मनसेमध्ये चढाओढ सुरु असल्याचे चित्र दिसत आहे. मनसेप्रमुख राज ठाकरे (राज ठाकरे) यांनी या निर्णयाबद्दल महाविकासआघाडी सरकारचे अभिनंदन केले असले तरी हे श्रेय महाराष्ट्र सैनिकांचेच आहे, ते लाटण्याचा आचरटपणा कोणीही करु नये, असेही ठणकावून सांगितले आहे.
Marathi boards on shops: उद्धव ठाकरेंच्या निर्णयाला राज ठाकरेंचा पाठिंबा, म्हणाले, आता कच खाऊ नका
शिवसेनेच्या पायाखालची वाळू सरकल्याने मराठी पाट्यांचा निर्णय घेतला: संदीप देशपांडे

राज्य सरकारने दुकानांवर मराठी पाट्यांच्या सक्तीचा निर्णय घेतल्यानंतर मनसे नेते संदीप देशपांडे यांनी शिवसेनेला टोला लगावला. रामायण वाचले असेल तर कुंभकर्ण बारा-बारा वर्षे झोपायचा, असे म्हणतात. हा सरकारचा जो कुंभकर्ण आहे, तो घरी १४ वर्ष झोपला होता. महापालिका निवडणुकीच्यानिमित्ताने शिवसेनेच्या पायाखालची वाळू सरकली आहे. यामुळे मराठी पाट्यांचा निर्णय घेतला. आमची हरकत नाही, आम्ही त्याचे स्वागत करतो. या निर्णयाची अंमलबजावणी व्हायला हवी. १९६२ पासून कायदा होतो, आता पुन्हा आलाय. अंमलबजावणी नाही झाली तर मनसे खळखट्ट्याक केल्याशिवाय राहणार नाही, असा इशारा मनसेचे नेते संदीप देशपांडे यांनी दिला आहे.