हायलाइट्स:
- अमेरिकेत रुग्णालयात दाखल होणाऱ्या रुग्णांच्या संख्येत वाढ
- करोना संसर्ग रोखण्यासाठी प्रशासनानं उघडली मोहीम
- चीन, पाकिस्तानातही कडक निर्बंधात वाढ
अमेरिकेत रुग्णालयात दाखल झालेल्या करोनाबाधितांच्या संख्येत बुधवारी विक्रमी वाढ झाली. ओमिक्रॉन संसर्गामुळे १,५१,१६१ जणांना विविध ठिकाणी दाखल करण्यात आल्याचे वैद्यकीय सूत्रांनी स्पष्ट केले.
देशात १९ राज्यांत अतिदक्षता विभागांमध्ये फक्त १५ टक्के खाटा शिल्लक असल्याचे सांगण्यात आले. त्यातही केंटुकी, अलाबामा, इंडियाना, न्यू हॅम्पशायर आदी ठिकाणी रुग्णांची संख्या अधिक आहे. अॅरिझोना, जॉर्जिया, मिसिसीपी, न्यू मेक्सिको, टेक्सास या राज्यांतही स्थिती गंभीर आहे.
चाचण्या होणार दुप्पट
अमेरिकेत घरोघरी होणाऱ्या मोफत चाचण्यांचे प्रमाण दुप्पट करण्याची घोषणा अध्यक्ष जो बायडेन यांनी गुरुवारी केली. देशात आता एक अब्ज चाचण्या केल्या जाणार आहेत. त्याशिवाय, एन ९५ मास्कचेही वाटप केले जाईल. करोना संसर्ग रोखण्यासाठी प्रशासनाने मोहीम उघडली असून त्यात आणखी काही उपाययोजनांचा समावेश असल्याचे बायडेन यांनी म्हटले आहे. त्यात लष्करी डॉक्टर तैनात करण्याचाही समावेश आहे.
Omicron Variant: ओमिक्रॉनला रोखण्यासाठी दोन मास्कचा वापर फायदेशीर? तज्ज्ञ म्हणतात…
Corona Vaccine: ‘ओमिक्रॉन’विरुद्ध या लशीचा बुस्टर डोस ठरतोय अधिक प्रभावी
चीनमध्ये निर्बंध कडक
हिवाळी ऑलिम्पिकच्या पार्श्वभूमीवर शहर आणि देशभरात करोनानिर्बंध कडक करण्यात आले आहेत. चिनी सरकारची ही हालचाल पाहता संसर्गात वाढ होण्याची शक्यता वर्तविली जात आहे. मुलांच्या शाळा, ज्येष्ठ नागरिकांचे फिरणे, विमानप्रवास आदींवर बंधने घालण्यात आली आहेत. त्याशिवाय, चाचण्यांची संख्या वाढविण्याचे आदेश देण्यात आले आहेत.
हाँगकाँगमध्ये विमानांवर बंदी
हॉँगकॉँग येथील आंतरराष्ट्रीय विमानतळावर १५० देशांतील विमानांना बंदी करण्यात आली आहे. संसर्ग रोखण्यासाठी हे पाऊल उचलण्यात आल्याचे सूत्रांनी म्हटले आहे. गेल्या २१ दिवसांत अमेरिका, ब्रिटनसह इतर देशांत असलेल्या नागरिकांना या बाबतची माहिती देण्यात आली आहे.
बाधितांचा उच्चांक
फिलिपीन्समध्ये शुक्रवारी दैनंदिन बाधितांचा विक्रम झाला. नव्याने संसर्ग झालेल्या ३७,२०७ जणांची नोंद झाली. त्यामुळे एकूण सक्रिय रुग्ण २,६५,५०९ झाले आहेत. यात आठ प्रयोगशाळांच्या निष्कर्षांचा समावेश नाही. शहरांतील वाहतुकीवरही निर्बंध आणले जाण्याची शक्यता वर्तविली जात आहे.
सिंधमध्ये लॉकडाउन शक्य
सिंध प्रांतात लॉकडाउन लावला जाण्याची शक्यता आहे. स्थानिक प्रशासनाने शाळा बंद केल्या असून इतर संस्थांनाही कामकाज बंद करण्याचे निर्देश दिले आहेत. रुग्णसंख्या सातत्याने वाढत असल्याने हा निर्णय घ्यावा लागत असल्याचे प्रशासनाने म्हटले आहे.
VIDEO: डोनाल्ड ट्रम्प यांच्यावर ड्रोन हल्ला; ईराणच्या सर्वोच्च नेत्याकडून ‘तो’ व्हिडिओ जारी
Rishi Sunak: नारायण मूर्तींचे जावई ऋषी सुनक होणार ब्रिटनचे नवे पंतप्रधान?
