shivsena: ठाण्यात पुन्हा ‘अघोरी राजकारण’, शिवसेना-काँग्रेसच्या उमेदवाराला हरवण्यासाठी जादूटोणा – shahapur nagar panchayat election rivals doing black magic on shivsena congress candidates

ठाणे: ठाण्याच्या ग्रामीण भागामध्ये नगरपंचायतीच्या निवडणूक येऊन ठेपली आहे. येत्या १८ जानेवारीला शहापूर येथील नगरपंचायत निवडणूक पार पडणार आहे. मात्र या निवडणुकीत निवडणूक जिंकण्यासाठी चक्क अघोरी प्रकार केल्याची धक्कादायक प्रकार समोर आली आहे. यामध्ये कागदावर उमेदवारांची प्रतिकृती काढून त्यांच्या पक्षाची चिन्ह काढून त्यावर या उमेदवाराची निवडणुकीत हार झाली पाहिजे असे लिहलेले आहे. त्यामुळे निवडणुकीच्या काळात अशा प्रकारच्या घटनेमुळे एकच खळबळ उडाली आहे. या निवडणुकीत सर्वच पक्षांना आपल प्राबल्य दाखवून विजय मिळवायचा असतानाच अशा प्रकारे सर्व गोष्टी करून मतदारांना अंधश्रद्धा च्या मार्गातून अघोरी कृत्याकडे नेणारी प्रवृत्ती ही पुरोगामी महाराष्ट्राला काळिमा फासणारा प्रकार या व्हायरल व्हिडीओ आणि फोटोच्या माध्यमातून समोर आला आहे.

पुरोगामी महाराष्ट्रात काळिमा फासणारी एक घटना घडली आहे. अंधश्रद्धेतून अघोरी प्रकार केल्याची घटना ठाणे जिल्ह्यातील शहापूर तालुक्यात घडला आहे. शहापूरमध्ये OBC जागेवर स्थगिती आल्याने चार जागांसाठी येत्या १८ जानेवारीला नगरपंचायतीच्या निवडणूका पार पडणार आहेत. या निवडणुकीत भाजप, शिवसेना, राष्ट्रवादी काँग्रेस व काँग्रेस या पक्षांनी आपले उमेदवार रिंगणात उभे केले आहेत. मात्र, खरी लढत ही भाजप आणि शिवसेनेत होणार आहे. निवडणुकीला रंग चढत असताना शिवसेनेच्या उमेदवारांसह काँग्रेसच्या उमेदवारावर अघोरी प्रकारचे कृत केले गेल्याचे व्हिडीओ आणि फोटो सध्या शहापूर तालुक्यात व्हायरल होत आहे. या व्हिडीओमध्ये शिवसेनेचे मयुरी म्हात्रे, मालती म्हात्रे, रंजना शिंदे तर काँग्रेस पक्षाचे जान्हवी देशमुख यांची पेपर वर पेनाने प्रतिकृती आणि पक्षाचे चिन्ह म्हणजेच धनुष्यबाण आणि हाताचा पंजा रेखाटून निवडणुकीत हार झाली पाहिजे असे लिहिले आहे. एवढेच नव्हे तर दोन उमेदवारांचे फोटो देखील पेपरला चिकटवले होते. हे सर्व कागद अघोरी पद्धतीने जाळण्यात आले होते. तर यात समोर आढळलेले कागद आणि फोटो हे अर्धे जळालेल्या अवस्थेत एक सामसूम जागी अंधाऱ्या जंगलाच्या कडेला सापडल्याचे दिसून येत आहेत. त्यानंतर हा अघोरी प्रकार उघड झाला.

एकीकडे नगरपंचायतीच्या निवडणुकीला रंग चढत असताना दुसरीकडे शिवसेनेच्या उमेदवारांसह काँग्रेसच्या उमेदवारावर अघोरी प्रकारचे कृत्य केल्याचे व्हिडीओ आणि फोटो समोर आल्यानंतर शहापूर तालुक्यात एकच खळबळ उडाली आहे. असा प्रकार यापूर्वी देखील निवडणुकीच्या काळात घडला होता. वाडा परिसरात जिल्ह्याचे पालकमंत्री एकनाथ शिंदे यांचा फोटो दाखवून अघोरी प्रकार केल्याचं समोर आलं होतं. त्यानंतर पुन्हा असाच प्रकार शहापूर नगरपंचायत निवडणूक जिंकण्यासाठी केल्याचे समोर आल्याने अंधश्रद्धेतून अघोरी प्रकार केल्याची ही घटना पुरोगामी महाराष्ट्राला काळीमा फासणारी आहे.