nitesh rane: Nitesh Rane: नितेश राणेंना न्यायालयाचा जोरदार झटका, राणेंच्या जुहूतील बंगल्याबाहेरील सुरक्षेत अचानक वाढ – bjp mla nitesh rane anticipatory bail plea denied by mumbai hc mumbai police increase security outside narayan rane residence in mumbai

मुंबई : संतोष परब हल्लाप्रकरणात मुंबई उच्च न्यायालयाने भाजप आमदार नितेश राणे यांना अटकपूर्व जामीन नाकारत जोरदार झटका दिला आहे. त्यामुळे नितेश राणे यांना अटक होणार का, असा प्रश्न उपस्थित झाला होता. मात्र, सर्वोच्च न्यायालयाने नितेश राणे (नितेश राणे) यांना २७ जानेवारीपर्यंत अटकेपासून संरक्षण दिले आहे. या कालावधीत नितेश राणे अटकपूर्व जामिनासाठी सर्वोच्च न्यायालयात अर्ज करतील. या सगळ्या घडामोडींमुळे शिवसेना विरुद्ध राणे असा संघर्ष पुन्हा एकदा रंगू शकतो. या पार्श्वभूमीवर केंद्रीय मंत्री नारायण राणे यांच्या जुहूतील बंगल्याबाहेर पोलिसांचा बंदोबस्त वाढवण्यात आला आहे.

काही दिवसांपूर्वी नारायण राणे यांनी मुख्यमंत्री उद्धव ठाकरे यांच्याविषयी अपमानजनक शब्द वापरले होते. तेव्हा नारायण राणे (नारायण राणे) यांना अटक करण्यात आली होती. त्यावेळी शिवसेनेच्या कार्यकर्त्यांनी नारायण राणे यांच्या मुंबईतील बंगल्याबाहेर जोरदार निदर्शने केली होती. यादरम्यान शिवसेना आणि भाजपचे कार्यकर्ते एकमेकांना भिडलेही होते. हा अनुभव लक्षात घेता मुंबई पोलिसांकडून नारायण राणे यांच्या बंगल्याबाहेरची सुरक्षा वाढवण्यात आल्याची शक्यता आहे.
Nitesh Rane: नितेश राणेंना मोठा झटका, उच्च न्यायालयाने अटकपूर्व जामीन अर्ज फेटाळला
उच्च न्यायालयाने सोमवारी संतोष परब हल्लाप्रकरणातील कथित आरोपी नितेश राणे आणि गोट्या सावंत यांचा अटकपूर्व जामीन अर्ज फेटाळला. तर नितेश राणे यांचे सहकारी आणि सिंधुदुर्ग जिल्हा बँकेचे नवनिर्वाचित अध्यक्ष मनिष दळवी यांना अटकपूर्व जामीन मंजूर केला. नितेश राणे यांच्या वकिलांनी आपण कोर्टाचा संपूर्ण आदेश वाचल्यानंतरच पुढील भूमिका ठरवू, असे सांगितले.

संतोष परब हल्लाप्रकरणात कणकवली पोलिसांनी अटकेच्या हालचाली सुरु केल्यानंतर नितेश राणे यांनी सर्वप्रथम सत्र न्यायालयात अटकपूर्व जामिनासाठी अर्ज केला होता. मात्र, सत्र न्यायालयाने हा अर्ज फेटाळला होता. त्यानंतर नितेश राणे यांनी उच्च न्यायालयात धाव घेतली. यादरम्यान तब्बल १५ दिवस नितेश राणे अज्ञातवासात होते. अखेर सिंधुदुर्ग जिल्हा बँकेच्या अध्यक्षपदाची निवडणूक पार पडल्यानंतर ते कणकवलीत प्रकटले होते. त्यावेळी नितेश राणे यांनी आपण १७ जानेवारीनंतर बोलू, असे म्हटले होते.