दिल्लीच्या हॉस्पिटलमधील डॉक्टर, नर्सेसना करोना

सुनिल चावके, मटा, विशेष प्रतिनिधी, नवी दिल्लीः दिल्लीतील राममनोहर लोहिया हॉस्पिटलमधील (RML) डॉक्टर्स आणि नर्सेसनाच करोनाची लागण झाल्याची धक्कादायक माहिती समोर आली आहे. सर्व संशयित रुग्णांना लोहिया हॉस्पिटलमध्येच दुसऱ्या वॉर्डमध्ये हलवण्यात आलं आहे.

RMLमधील एका वरिष्ठ वैद्यकीय अधिकाऱ्याने ही माहिती दिलीय. RMLमधील वरिष्ठ डॉक्टर्स आणि नर्सेसनाच करोनाची लागण झाल्याचा संशय आहे. यामुळे या सर्वांना नियमानुसार क्वारंटाइन करण्यात आलं आहे. तसंच RMLमधील संपूर्ण स्टाफलाच क्वारंटाइन केलं गेलं आहे, अशी धक्कादायक माहिती समोर आली आहे.

दरम्यान, दिल्लीतील करोनाच्या रुग्णांची संख्या वाढली असून ती ७२ वर गेली आहे. दिल्लीत रविवारी २३ नवे करोनाचे रुग्ण आढळून आलेत. तर दिल्लीत आतापर्यंत करोनामुळे दोन जणांचा मृत्यू झाला आहे. तर ५ जणांना उपचारानंतर डिस्चार्ज देण्यात आला आहे.