हायलाइट्स:
- शिवसेना पक्षप्रमुख उद्धव ठाकरे बाळासाहेबांच्या जयंतीनिमित्त शनिवारी रात्री आठ वाजता व्हीडिओ कॉन्फरन्सिंगद्वारे शिवसैनिकांशी संवाद साधणार आहेत
- येत्या काळात होणाऱ्या महानगरपालिका आणि जिल्हा परिषदा निवडणुका लक्षात घेता शिवसेना पक्ष प्रमुख उद्धव ठाकरे हे शिवसैनिकांना काय आदेश देतात, याकडे आता सर्वांचे लक्ष लागलेले आहे.
बाळासाहेब ठाकरे यांच्या जयंतीनिमित्त राज्यभरात शिवसैनिकांकडून त्यांना आदरांजली वाहिली जात आहे. यानिमित्ताने दादर शिवाजी पार्क येथील बाळासाहेब ठाकरेंच्या स्मृती स्थळावर फुलांनी सजावट करण्यात आली आहे. तर शिवसेना पक्षप्रमुख उद्धव ठाकरे बाळासाहेबांच्या जयंतीनिमित्त शनिवारी रात्री आठ वाजता व्हीडिओ कॉन्फरन्सिंगद्वारे शिवसैनिकांशी संवाद साधणार आहेत. येत्या काळात होणाऱ्या महानगरपालिका आणि जिल्हा परिषदा निवडणुका लक्षात घेता शिवसेना पक्ष प्रमुख उद्धव ठाकरे हे शिवसैनिकांना काय आदेश देतात, याकडे आता सर्वांचे लक्ष लागलेले आहे.
मी जो काही आहे तो बाळासाहेब ठाकरेंमुळेच: संजय राऊत
शिवसेना खासदार संजय राऊत यांनीही शनिवारी मुंबईत प्रसारमाध्यमांशी बोलताना बाळासाहेबांच्या आठवणींना उजाळा दिला. तुम्ही आज जो संजय राऊत पाहत आहात, तो बाळासाहेब ठाकरे यांच्या आशीर्वादामुळेच आहे. बाळासाहेब ठाकरे यांनी मला एखाद्या मातीच्या गोळ्यापासून घडवले. त्यांनी लहान वयात माझ्यावर शिवसेना आणि ‘सामना’च्या संपादकपदासारख्या अनेक महत्त्वाच्या जबाबदाऱ्या टाकल्या. वयाच्या अवघ्या २८व्या वर्षी माझ्याकडे सामनाच्या संपादकीय कामाची जबाबदारी सोपविली. मी बिघडू नये म्हणून त्यांचा हंटरही माझ्याभोवती होता. एखादा मनाने खचलेला माणूस बाळासाहेबांना भेटायला गेला तर लढण्याची प्रेरणा घेऊनच जायचा. मी स्वत: अनेक लढाया त्यांच्या प्रेरणेनेच लढलो आहे, असे संजय राऊत यांनी म्हटले.
आज बाळासाहेब ठाकरे असते तर विरोधी पक्षाची पोपटपंची चालली नसती, सगळेच थंड पडले असते: संजय राऊत
