sanjay raut: भाजपमध्ये आजघडीला तुमचं काय स्थान उरलंय, पुनम महाजनांच्या जळजळीत टीकेनंतर राऊतांचा पलटवार – shivsena mp sanjay raut hits back bjp leader poonam mahajan over old cartoon of balasaheb thackeray and pramod mahajan

मुंबई: भाजप नेत्या पुनम महाजन यांनी जळजळीत शब्दांत केलेल्या टीकेला शिवसेना खासदार संजय राऊत यांनी प्रत्युत्तर दिले आहे. पुनम महाजन (Poonam Mahajan) यांनी मी ट्विट केलेल्या व्यंगचित्रावरुन इतकं अस्वस्थ होण्याचे कारण नाही. मी काही प्रमोद महाजन (Pramod Mahajan) यांच्यावर वैयक्तिक टिप्पणी केली नव्हती. मला केवळ शिवसेना-भाजप युतीच्या सुरुवातीच्या काळात काय अवस्था होती, हे दाखवून द्यायचे होते. हे व्यंगचित्र मी काढलेलं नाही. आर.के. लक्ष्मण यांचे हे व्यंगचित्र त्यावेळी ‘टाईम्स ऑफ इंडिया’च्या पहिल्या पानावर छापून आले होते. त्यामुळे पुनम महाजन यांनी इतकं अस्वस्थ होण्याची गरज नाही. पुनम महाजन या भाजपच्या खासदार आहेत. पण त्या आजकाल कुठे आहेत, हे माहिती नाही. भाजप पक्ष रुजवण्यात प्रमोद महाजन, गोपीनाथ मुंडे आणि मनोहर पर्रिकर या नेत्यांचे मोठे योगदान आहे. पण आजच्या भाजपमध्ये महाजन, मुंडे आणि पर्रिकर कुटुंबीय अंधारात गेले आहेत, असे संजय राऊत यांनी म्हटले. ते मंगळवारी मुंबईत प्रसारमाध्यमांशी बोलत होते. (Shivsena MP Sanjay Raut on Poonam Mahajan statement)

यावेळी संजय राऊत यांनी भाजप नेत्यांना पुन्हा एकदा बाळासाहेब ठाकरे यांनी केलेल्या उपकारांची जाणीव करुन दिली. बाळासाहेब ठाकरे यांनी त्यावेळी उघडपणे पुरस्कार केला होता. हिंदुत्व वाढेल, या मुद्द्यावर एकत्र निवडणुका लढू शकतो, असा प्रस्ताव भाजप नेत्यांनी त्यांच्यासमोर ठेवला. यामध्ये प्रमोद महाजन आणि अटलबिहारी वाजपेयी यांचा समावेश होता. तेव्हा बाळासाहेबांनी हिंदुत्ववादी मतांचे विभाजन टाळण्यासाठी मोठ्या मनाने भाजपशी युती केली. मात्र, भाजपच्या नवहिंदुत्वावादी नेत्यांना याचा विसर पडला आहे. त्यांच्याकडे इतिहासाची फाडलेली पाने नाहीत. त्यामुळे त्यांना हा सगळा इतिहास अवगत नाही. परंतु, आम्ही भाजपच्या नव्या नेत्यांना वेळोवेळी याची आठवण करुन देऊ, असे संजय राऊत यांनी म्हटले.
Sanjay Raut: कोण कोणामुळे वाढलं, ते पाहाच; संजय राऊतांनी ट्विट केलं ‘ते’ जुनं व्यंगचित्र

पुनम महाजन काय म्हणाल्या होत्या?

संजय राऊत यांनी भाजपला चिमटा काढण्यासाठी एक जुने व्यंगचित्र सोशल मीडियावर शेअर केले होते. मात्र, हे व्यंगचित्र पाहून प्रमोद महाजन (Poonam Mahajan) यांची कन्या पुनम महाजन यांचा संताप अनावर झाला आहे. पुनम महाजन यांनी संजय राऊत (Sanjay Raut) यांना अत्यंत तिखट भाषेत प्रत्युत्तर दिले आहे. स्वर्गीय बाळासाहेब व स्वर्गीय प्रमोदजी, या दोन मर्दांनी हिंदुत्वासाठी युती केली होती. नामर्दांसारखे कार्टून दाखवू नका, अशी जळजळीत टीका पुनम महाजन केली होती.