मृतांपैकी एक ३७ वर्षीय तरुण छत्रपती प्रमिलाराजे रुग्णालयातील विशेष करोना कक्षात भरती होता. तर दुसऱ्या ८५ वर्षीय रुग्णावर शहरातील एका खासगी रुग्णालयात उपचार सुरू होते. दोन्ही संशयीत रुग्णांना न्यूमोनिया झाला होता, असे समजते. संबंधित दोघांच्या घशातील नमुने तपासणीसाठी पुण्याला राष्ट्रीय विषाणू प्रयोगशाळेत पाठवण्यात आले आहेत. त्याचा अहवाल प्रलंबित असून रिपोर्ट आल्यानंतर मृत्यूचे कारण स्पष्ट होणार आहे.
करोना संशयितांचा मृत्यू झाल्याने शहरात खळबळ उडाली आहे. सीपीआर करोना कक्षातील मृत तरुण हातकणंगले येथील होता. त्याला मंगळवारी पहाटे अडीच वाजताच्या सुमारास उपचारासाठी सीपीआरमध्ये आणण्यात आले होते. सकाळी साडे अकरा वाजता त्याचा मृत्यू झाला. त्याला न्यूमोनिया होता. खबरदारी म्हणून त्याच्या घशातील नमुने तपासणीसाठी घेण्यात आले आहेत. तर दुसरी ८५ वर्षीय व्यक्ती कदमवाडीतील खासगी रुग्णालयात उपचार घेत होती. या रुग्णाला श्वसन आणि उच्च रक्तदाबाचा त्रास होता. त्याचा करोना तपासणीसाठी स्वॅब घेण्यात आला होता. त्याचा अहवाल प्रलंबित आहे. दोघा मृत रुग्णांचे अहवाल आल्यानंतर मृत्यूचे कारण स्पष्ट होणार आहे.
दरम्यान, खबरदारी म्हणून शहरातील पोलीस बंदोबस्तात वाढ करण्यात आली असून शासनाने दिलेल्या निर्देशांचे काटेकोरपणे पालन होण्यासाठी पावले टाकण्यात येत आहेत.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
