यावेळी किरीट सोमय्या यांनी म्हटले की, अशोक गर्ग हे २०१० पासून दोन कंपन्या चालवतात. यापैकी एक कंपनी वाइन वितरणाचा व्यवसाय करते. मुंबई आणि पुणे परिसरातील हॉटेल्स, क्लब आणि पबमध्ये अशोक गर्ग यांच्या कंपनीकडून वाइन पुरवली जाते. या व्यवसायात अशोक गर्ग यांच्या कंपनीची एकाधिकारशाही आहे. अशोक गर्ग यांच्या व्यवसायाची वार्षिक उलाढाल साधारण १०० कोटी इतकी आहे. १६ एप्रिल २०२१ रोजी संजय राऊत यांनी अशोक गर्ग यांच्याशी भागीदारी केली. त्यांच्या कन्या विधिता आणि पूर्वशी राऊत या दोघीही कंपनीत भागीदार आहेत. संजय राऊत यांनी आपल्या हितसंबंधांची माहिती जाहीर करायला हवी होती, असे किरीट सोमय्या यांनी म्हटले. येत्या काही दिवसांमध्ये मी लवकरच संजय राऊत यांच्या आणखी एका व्यवसायाचे तपशील जाहीर करेन, असेही किरीट सोमय्या यांनी म्हटले.
दारू नव्हे, वाइनविक्रीला परवानगीसंजय राऊत यांची वाइन उद्योगात गुंतवणूक असल्यामुळे ते आता राज्य सरकारच्या निर्णयाचे समर्थन करत आहेत. वाइन म्हणजे दारु नव्हे, असा युक्तिवाद ते करत आहेत, असेही किरीट सोमय्या यांनी सांगितले.
संजय राऊत काय म्हणाले होते?
वाईन म्हणजे दारु नाही अशी भूमिका संजय राऊत यांनी घेतली होती. राज्यात वाईनची विक्री वाढली तर शेतकऱ्यांना त्याचा फायदा होईल असे संजय राऊतांनी म्हटले आहे. शेतकऱ्यांचे उत्पन्न दुप्पट करण्यासाठी आम्ही हे केले आहे. भाजप नेते फक्त विरोध करतात ते शेतकऱ्यांसाठी काहीही करु शकत नाहीत असा पलटवार संजय राऊत यांनी भाजपवर केला होता.
