कोल्हापूर उत्तर विधानसभा निवडणुकीत दुरंगी लढत; जयश्री जाधव विरुद्ध सत्यजित कदम सामना? – kolhapur north assembly by-election: satyajit kadam likely to get bjp candidature

कोल्हापूर : कोल्हापूर उत्तर विधानसभा पोटनिवडणुकीची चार दिवसात घोषणा होण्याची शक्यता आहे. महाविकास आघाडीच्या अंतर्गत ही जागा काँग्रेसकडे असल्याने जयश्री जाधव यांची उमेदवारी जवळजवळ जाहीर झाल्यात जमा आहे. विरोधी भाजपकडून सत्यजित कदम यांचे नाव निश्चित करण्यात आलं आहे. याबाबतची घोषणाही लवकरच होणार आहे. यामुळे उत्तरचा सामना दुरंगी होणार असून महापालिका निवडणुकीच्या पार्श्वभूमीवर चुरस रंगणार आहे. (Kolhapur North Assembly Constituency)

आमदार चंद्रकांत जाधव यांच्या निधनामुळे विधानसभेची उत्तर मतदारसंघाची जागा रिक्त आहे. या जागेसाठी चार दिवसांत निवडणूक जाहीर होण्याची शक्यता आहे. साधारणत: ७ अथवा ८ मार्चला यासाठी मतदान होणार असल्याचे समजते. यामुळे कोल्हापुरात सध्या राजकीय घडोमोडींना वेग आला आहे. जाधव हे काँग्रेसचे आमदार होते. त्यामुळे ही जागा या पक्षाला मिळणार हे निश्चित आहे. त्या जागेवर जाधव यांच्या पत्नी जयश्री यांना उमेदवारी देण्यात येणार आहे. ही निवडणूक बिनविरोध व्हावी यासाठी महाविकास आघाडीत प्रयत्न सुरू आहेत. त्यासाठी आघाडीच्या नेत्यांबरोबरच विरोधी पक्षनेते देवेंद्र फडणवीस आणि भाजपचे प्रदेशाध्यक्ष चंद्रकांत पाटील यांना भेटणार असल्याचे पालकमंत्री सतेज पाटील यांनी सांगितलं आहे. तशा हालचाली सुरू झाल्या आहेत.

Rahul Gandhi vs PM Modi: राहुल यांच्यावर केंद्रीय मंत्र्यांचा प्रतिहल्ला; ‘मोदी आज पंतप्रधान नसते तर…’

‘पक्षप्रमुखांनी आदेश दिल्यास आपण लढू’ असा पवित्रा नियोजन मंडळाचे कार्यकारी अध्यक्ष राजेश क्षीरसागर यांनी घेतला आहे. दोन वर्षातील पोटनिवडणुकीचा इतिहास पाहता मैत्रीपूर्ण लढतीची शक्यता फारच कमी आहे. यामुळे ही लढत काँग्रेस आणि भाजपमध्येच होण्याची चिन्हे आहेत. भाजपच्या वतीने पश्चिम महाराष्ट्र देवस्थान समितीचे माजी अध्यक्ष महेश जाधव, माजी नगरसेवक सत्यजित कदम, जिल्हाध्यक्ष राहूल चिकोडे आणि दौलत देसाई यांची नावे चर्चेत आहेत.

निवडणूक लढवण्याबाबत भाजपच्या काही प्रमुख नेत्यांची नुकतीच एक बैठक झाली. यामध्ये उमेदवारीबाबत सविस्तर चर्चा करण्यात आली. कदम यांच्या नावाला हिरवा कंदिल मिळाल्याचे समजते. त्यामुळे त्यांनी जोरदार तयारी सुरू केली आहे. मतदारसंघातील सर्व नेत्यांच्या त्यांनी भेटीगाठी सुरू केल्याने त्यांची उमेदवारी जवळजवळ निश्चित झाल्याचे बोलले जात आहे. यामुळे जयश्री जाधव आणि कदम यांच्यात सामना रंगणार आहे.

एप्रिल अथवा मे महिन्यात कोल्हापूर महानगरपालिकेची निवडणूक होण्याची शक्यता आहे. त्याची रंगीत तालीम म्हणून भाजपने विधानसभा पोटनिवडणूक लढवावी असे निश्चित झाले आहे. पण, बिनविरोधाचा प्रस्ताव काँग्रेसकडून दिल्यानंतर राज्यपातळीवर काय घडामोडी होणार यालाही महत्त्व राहणार आहे. सध्याच्या राजकीय हालचाली पाहता बिनविरोधाची शक्यता फारच कमी वाटते. पण, विधानपरिषदेची निवडणूक शेवटच्या क्षणी बिनविरोध झाली होती. यामुळे विधानसभा पोटनिवडणुकीत काय होणार याची उत्सुकता वाढली आहे.