करोना व्हायरसचा फटका चार वर्षांतून एकदा खेळवल्या जाणाऱ्या ऑलिम्पिक क्रीडा स्पर्धेलाही चांगलाच बसला आहे. कारण यावर्षी जपानमध्ये होणार ही स्पर्धा आता पुढे ढकलण्याचा निर्णय घेण्यात आला आहे.
करोना व्हायरसमुळे भारतातील क्रीडा स्पर्धांनाही चांगलाच धक्का बसला आहे. बीसीसीआयला भारत आणि दक्षिण आफ्रिका यांच्यातील एकदिवसीय क्रिकेट मालिका रद्द करावी लागली होती. त्याचबरोबर आयपीएलही आता पुढे ढकलण्यात आले आहे. यंदाचे आयीपीएल २९ मार्चपासून सुरु होणार होते. पण करोना व्हायरसमुळे यंदाचे आयपीएल १५ एप्रिलपर्यंत पुढे ढकलण्यात आले आहे.
करोना व्हायरसमुळे जवळपास सर्वच देशांनी आंतरराष्ट्रीय विमान प्रवास बंद केला आहे. त्यामुळे आयपीएल खेळण्यासाठी परदेशी खेळाडू तयार असले तरी त्यांना भारतामध्ये येता येणार नाही. त्यामुळे आयपीएल खेळवण्याची समस्या बिकट असल्याचे म्हटले जात आहे. पण यावर तोडगा राजस्थान रॉयल्सच्या संघाने काढलेला आहे.
राजस्थान रॉयल्सचे मुख्य कार्यकारी अधिकारी रंजित बरठाकूर यांनी सांगितले की, ” सध्याच्या घडीला जगभरात करोना व्हायरसमुळे चिंताग्रस्त वातावरण आहे. त्यामुळे यंदाची आयपीएल होणार की नाही याबद्दल काही जणांच्या मनात शंका आहे. पण एक गोष्ट केली तर यंदाची आयपीएल खेळवण्यात येऊ शकते. पण त्यामध्ये फक्त भारतीय खेळाडूंचा समावेश करावा आणि सामन्यांची संख्या कमी करावी, असे केल्यास यंदाचे आयपीएल होऊ शकते. सध्याच्या घडीला परदेशी खेळाडू येणार की नाही याबद्दल साशंकता आहे. त्यामुळे त्यावर हा पर्याय काढता येऊ शकतो आणि आयपीएल खेळवण्याचा मार्ग मोकळा होऊ शकतो. ”
ते पुढे म्हणाले की, ” बीसीसीआयला जर आयपीएल खेळवायची असेल तर त्यांना सर्व गोष्टींचा विचार करावा लागेल. कारण सध्याच्या घडीला करोना व्हायरसमुळे देशातील परिस्थिती साधारण नाही. त्याचबरोबर त्यांच्यावर बरेच दडपण असू शकते. त्यामुळे सर्व बाबींचा विचार करून बीसीसीआयला आयपीएल खेळवायची की नाही, हा निर्णय घ्यावा लागणार आहे.”
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
