गेल्या दोन दिवसांत ‘मेयो’त घडलेली ही दुसरी घटना आहे. सुदैवाने सोमवारी अशाच प्रकारे मृत्यू झालेल्याचा अहवाल नकारात्मक आल्याने प्रशासनाने सुटकेचा नि:श्वास सोडला होता. तोच आणखी एका संशयिताचा मृत्यू झाल्यानं प्रशासनाचा जीव टांगणीला लागला आहे. मध्य प्रदेशातील सिवनी येथील रहिवासी असलेल्या ७० वर्षीय रुग्णाची प्रकृती गेल्या काही दिवसांपासून खालावली होती. नातेवाईकांनी त्यांना मध्यप्रदेशातील खासगी रुग्णालयात उपचारासाठी नेले. मात्र त्यांचा श्वसनाचा त्रास कमी झाला नाही. यातच त्यांना न्युमोनिया झाल्याचंही निष्पन्न झालं होतं. त्यानंतर मध्य प्रदेशातील डॉक्टरांनी त्यांना नागपूरला पाठवले. त्याला घेऊन नातेवाईक मंगळवारी मध्यरात्री ‘मेयो’त आले. त्यानंतर करोना संशयितांसाठी तयार केलेल्या वार्ड क्रमांक ५ मध्ये भरती केले. तेथे त्यांचा मृत्यू झाला. त्यांच्या घशातील द्रव्याचे नमुने तातडीने प्रयोगशाळेकडे पाठविले आहेत. त्याचा अहवाल आल्यानंतरच मृत्यूचे कारण स्पष्ट होणार आहे.
स्वॅब कलेक्शन आता आमदार निवासातच
शहरातील मेडिकल आणि मेयोत सध्या करोनाग्रस्त रुग्णांवर उपचार सुरू आहेत. मात्र संभाव्य जोखीम लक्षात घेता आणि रुग्णालयात येणाऱ्यांची गर्दी लक्षात घेता प्रशासनाने नमुने गोळा करण्याच्या यंत्रणेचे विकेंद्रीकरण करण्याचा निर्णय घेतला आहे. ज्यांना करोना सदृश्य आजाराची प्राथमिक लक्षणे आहेत, मात्र ज्यांना श्वास घेण्यास अडचण नाही, अशा रुग्णांच्या घशातील द्रवाचे नमुने गोळा करण्याची व्यवस्था आमदार निवासातच करण्यात आली आहे. ज्यांना तातडीने उपचाराची गरज आहे आणि श्वास घेण्यास अडचण होत आहे, अशा रुग्णांव्यतिरिक्त संशयितांच्या घशातील द्रवाचे नमुने आमदार निवासातच घेतले जातील. त्यानंतर ते मेयोच्या प्रयोगशाळेत पाठविले जातील. या नमुन्यांचा अहवाल येईपर्यंत अशा संशयितांना आमदार निवासात ठेवले जाईल. त्याचा अहवाल सकारात्मक आला तर अशा संशयितांना तातडीने मेडिकल- मेयोत दाखल केले जाणार आहे. मात्र ज्यांचे नमुने नकारात्मक येतील त्यांना पुढील १४ दिवस आमदार निवासातच ठेवले जाणार आहे.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
