पुण्यात मोठी दुर्घटना; इमारतीचे काम सुरू असताना लोखंडी छत कोसळून ७ कामगार ठार – pune building collapse updates 7 workers killed as iron roof collapses

पुणे : येरवड्यातील शास्त्रीनगर परिसरात बांधकाम सुरू असलेल्या एका इमारतीच्या स्लॅबसाठी तयार केलेले लोखंडी जाळ्यांचे छत कोसळल्याची घटना गुरुवारी रात्री साडेअकराच्या सुमारास घडली. या जाळ्यांखाली अडकून सात कामगारांचा मृत्यू झाल्याची प्राथमिक माहिती आहे. तसंच उर्वरित आठ जणांना उपचारासाठी ससून रुग्णालयात हलवण्यात आलं आहे. (पुणे इमारत कोसळल्याची बातमी)

पुणे-नगर रस्त्यावर शास्त्रीनगर चौकाच्या अलीकडे वाडिया फार्मच्या जागेवर ब्ल्यू ग्रास कंस्ट्रकशनची इमारत उभारण्यात येत आहे. या इमारतीच्या बेसमेंटचे काम आता सुरू असून, तेथे भूमिगत स्लॅब टाकण्यात येत होता. त्यासाठी आवश्यक लोखंडी छत तयार करण्याचं काम १५ कामगार करत होते. ते प्रामुख्याने लोखंडी गजांचे वेल्डिंग करत होते. त्यावेळी हे वजनदार लोखंडी छत कोसळले.

बंडातात्या कराडकर अखेर नरमले; महिल्या नेत्यांची माफी मागत म्हणाले…

अग्निशमन दलाला याची वर्दी मिळताच दलाची टीम दुर्घटनास्थळी दाखल झाली. तसंच, येरवडा पोलीस देखील तेथे पोहोचले होते. लोखंडी गजांखाली अडकलेल्या कामगारांची सुटका करताना अग्निशमन दलाच्या जवानांना अडचणींचा सामना करावा लागला. जवानांनी कटरच्या साहाय्याने गज कापून मदतकार्याचा मार्ग खुला केला. एका मागोमाग एक त्यांनी सात जणांना बाहेर काढले, मात्र त्या सर्वांचा जागीच मृत्यू झाला होता, अशी माहिती अग्निशमन दलाच्या अधिकाऱ्यांनी दिली.

वाहतूक शाखेचे उपायुक्त राहुल श्रीरामे, उपायुक्त रोहिदास पवार, सहायक आयुक्त किशोर जाधव आदी यावेळी घटनास्थळी उपस्थित होते.

गुन्हा दाखल करणार

या ठिकाणी काम करणाऱ्या कर्मचाऱ्यांकडे सुरक्षा साधने नसल्याचं प्रथमदर्शनी दिसून आलं आहे. त्यामुळे संबंधित बांधकाम व्यावसायिक आणि ठेकेदार यांच्यावर गुन्हा दाखल करून पुढील कारवाई केली जाईल, असं येरवडा पोलीस ठाण्याचे वरिष्ठ निरीक्षक युनूस शेख यांनी सांगितलं आहे.