निझामुद्दीनमधील तबलीघी जमातच्या मरकझमध्ये जाऊन आलेल्या नागरिकांचा आता देशभरात शोध सुरू आहे. त्यांना क्वारंटाइन केलं जातंय. तर काहींच्या चाचण्या सुरू आहे. सर्व राज्यांना तबलीघीच्या कार्यक्रमात सहभाग घेण्यारांचा शोध घेण्याचे आदेश देण्यात आले आहेत.
निझामुद्दीन तबलीगी जमातच्या मरकझमध्ये जाऊन आलेल्या आणि आपल्या राज्यांमध्ये परतलेल्या ६ हजार जणांची ओळख पटवण्यात आली आहे. राज्य सरकारं सतत त्यांचा शोध घेत आहेत. विविध राज्यांमध्ये असलेल्या ५ हजार जणांना हॉस्पिटल्समध्ये क्वारंटाइन ठेवण्यात आलं आहे. गुजरात, तामिळनाडू आणि तेलंगणमध्ये किमान २००० जणांना अजूनही शोध सुरू आहे.
देशातील करोना रुग्णांची संख्या वाढून १८३४वर
बुधवारी दुपारपर्यंत करोना रुग्णांच्या संख्येत ३८६ जणांची भर पडली होती. त्यावेळी देशातील मृतांची संख्या ३८ असल्याचं आरोग्य मंत्रालयाकडून सांगण्यात आलं. पण बुधवारी संध्याकाळपर्यंत करोनाच्या मृतांचा देशातील आकडा ५०च्या जवळ म्हणजे ४१ वर पोहोचला. तर रुग्णांची संख्याही वाढून १८३४ पर्यंत गेला. गेल्या २४ तासांत ४३७ नवे रुग्ण आढळून आले आहेत, केंद्रीय आरोग्य मंत्रालयाने ही माहिती दिलीय.
दिल्लीतील करोना रुग्णांची संख्या १५२ झालीय. यातील ५३ रुग्ण हे निझामुद्दीन येथील तबलीघी जमात मरकझमधून आलेले आहेत. दुसरीकडे महाराष्ट्रातही करोनाचे ४० नवे रुग्ण आढळून आले. यात मुंबईतील ३० जणांचा समावेश आहे. तर ३४० करोना पॉझिटिव्ह रुग्णांवर उपचार सुरू आहेत. तर तिघांचा मृत्यू झाला आहे. तामिळनाडूत तबलीघी जमातचे ११० जण पॉझिटिव्ह आढळून आलेत. तेलंगणमध्ये ५७ रुग्ण आहेत. त्यापैकी मरकझचे ५० जण आहेत.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
