नागपूर बातम्या मराठी: ‘आम्हालाही द्या दीडपर्यंत परवानगी’, हॉटेल संचालक आक्रमक; प्रशासनाकडे मागणी – give us permission till half past one hotel director aggressive demand to the administration

नागपूर : करोना संक्रमणाच्या नावाखाली हॉटेल रात्री दहा वाजता बंद करण्याचा निर्बंध लावण्यात आला आहे. मात्र, त्याचवेळी मुंबई, पुणे येथे रात्री दीड वाजतापर्यंत हॉटेल्स खुले ठेवण्यास परवानगी देण्यात आली आहे. या पार्श्वभूमीवर आम्हालाही रात्री दीडपर्यंत अनुमती द्या, अशी मागणी शहरातील हॉटेल-रेस्टॉरंट संचालकांनी प्रशासनाकडे केली आहे.

करोनाची तिसरी लाट आल्यानंतर स्थानिक प्रशासनाने विविध निर्बंध घोषित केले. त्यामध्ये हॉटेल-रेस्टॉरंट रात्री दहा वाजता बंद करणे, मंगल कार्यालय-लॉनमध्ये ५० लोकांना परवानगी, या निर्बंधांचा प्रामुख्याने समावेश आहे. हे सर्व निर्बंध उपराजधानीत पाळले जात आहेत. परंतु, नागपूरपेक्षाही अधिक दैनंदिन बाधित असलेल्या मुंबई, पुणे येथे शिथिलता देण्यात आली आहे. या दोन्ही शहरांत हॉटेल-रेस्टॉरंट रात्री दीड वाजतापर्यंत सुरू ठेवण्यास प्रशासनाने मंजुरी दिली आहे. त्याचप्रमाणे लग्न वा इतर समारंभ असल्यास दोनशे लोकांना परवानगी आहे. जिथे करोनाबाधित अधिक आहेत; तिथे निर्बंधांत शिथिलता दिली जात असताना नागपुरात का नाही, असा प्रश्न हॉटेल संचालक, मंगल कार्यालय आणि लॉनचालकांनी उपस्थित केला आहे. मुख्य म्हणजे सध्या करोना बाधितांचा आकडा कमी झाला आहे. सातत्याने यामध्ये घट दिसून येत आहे. तेव्हा प्रशासनाने मुंबई, पुणे येथील नियम नागपुरातही लागू करावा, याकडे लक्ष वेधण्यात आले आहे. यासंदर्भात नागपूर रेसिडेन्शिअल हॉटेल असोसिएशने जिल्हाधिकाऱ्यांना निवेदन दिले आहे.

‘या’ तारखेपर्यंत मुंबई संपूर्ण निर्बंधमुक्त होणार, महापौरांची माहिती

‘त्या’ आदेशाचे व्हावे पालन

स्थानिक प्रशासनाने ४ जून रोजीच्या आदेशाचे पालन करायला हवे. त्या आदेशानुसार ऑक्सिजन बेडची उपलब्धता आणि करोना चाचणीच्या तुलनेत पॉझिटिव्हिटी दर यावरून निर्बंध निश्चित करण्यात येतात. निर्बंधांच्या वेगवेगळ्या लेव्हलदेखील त्यात निर्धारित करण्यात आल्या आहेत. परिणामत: त्या आदेशाचे पालन झाल्यास, अशा प्रकारची विधाने करण्याची स्थिती निर्माण होणार नाही, अशी भूमिका व्यावसायिकांद्वारे मांडण्यात येत आहे.
कर्नाटकातील हिजाब प्रकरणामुळे राज्य सरकार सतर्क,गृहमंत्र्यांची जनतेला ‘ही’ विनंती