पुण्यातील मध्यवस्तीत राहणाऱ्या या ५० वर्षीय महिलेला तीव्र स्वरूपाचा न्यूमोनिया झाला होता. त्यामुळे बुधवारी दुपारी या महिलेला ससून रुग्णालयात दाखल करण्यात आले होते. तिच्यावर अतिदक्षता विभागात उपचार सुरू असताना आज संध्याकाळी साडेसातच्या सुमारास तिचा मृत्यू झाला. तिला करोनाची लागण झाल्याचे निदान झाले होते, असे सांगण्यात आले असून पुण्यातील हा करोनाचा दुसरा बळी ठरला आहे.
राज्यात करोनाचा प्रादुर्भाव वाढत आहे. रुग्णांची संख्या आणि मृतांचा आकडा दिवसागणिक वाढत आहे. आज दिवसभरात राज्यात ८१ नव्या रुग्णांची भर पडली आहे. एकट्या मुंबईत ५७ नवे करोनाबाधित सापडले आहेत. तर पुण्यात सहा, पिंपरी-चिंचवडमध्ये तीन, अहमदनगरमध्ये नऊ, ठाण्यात पाच आणि बुलडाण्यात एकाला करोनाची लागण झाली आहे. राज्यात आता एकूण करोनाबाधितांची संख्या ४१६ झाली आहे. तर आतापर्यंत २० जणांचा करोनानं मृत्यू झाला आहे. तसंच आतापर्यंत ४२ जण करोनामुक्त झाले असून, त्यांना रुग्णालयातून घरी सोडण्यात आलं आहे, अशी माहितीही आरोग्य विभागाकडून देण्यात आली.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
