हा मराठमोळा खेळाडू आहे तरी कोण, पाहा…काही दिवसांपूर्वी झालेल्या युवा (१९-वर्षांखालील) विश्वचषकात महाराष्ट्राच्या राज्यवर्धन हंगरगेकरने दमदार कामगिरी केली होती. राज्यवर्धनसाठी या लिलावात २० लाख एवढी मूळ किंमत ठेवण्यात आली होती. राज्यवर्धनला संघात घेण्यासाठी पहिल्यांदा मुंबई इंडियन्सचा संघ पुढे सरसावला होता. मुंबई इंडियन्स राज्यवर्धनला आपल्या संघात घेत असल्याचे पाहत लखनौ सुपरजायंट्सच्या संघाने त्याच्या लिलावात उडी घेतली. त्यामुळे मुंबई इंडियन्स आणि लखनौच्या संघात चांगलीच जुगलबंदी सुरु झाली. पण त्याचवेळी चेन्नई सुपर किंग्सच्या संघाने राज्यवर्धनसाठी आपले बाहू सरसावले आणि त्याला संघात घेण्यासाठी जोरदार प्रयत्न सुरु केले. राज्यवर्धन २० लाखावरून एक कोटीच्या घरात आला तेव्हा मात्र मुंबई इंडियन्सने त्याचा नाद सोडू दिला आणि चेन्नई सुपर किंग्सच्या संघाने तब्बल १ कोटी ५० लाख रुपये मोजत त्याला आपल्या संघात दाखल करून घेतले. भारताने युवा विश्वचषक जिंकला आणि त्यामध्ये राज्यवर्धनचा मोलाचा वाटा होता. कठीण प्रसंगी राज्यवर्धनने संघाला सारवल्याचेही पाहायला मिळाले. त्याचबरोबर या संपूर्ण विश्वचषकात तो लक्षवेधी ठरला होता. भारतीय संघाला बऱ्याचदा त्याने चांगली सुरुवात करून दिली होती. आपल्या वेगवान गोलंदाजीने राज्यवर्धनने या विश्वचषकता आपली छाप पाडली होती. त्याचबरोबर संघाला जेव्हा गरज होती तेव्हाही त्याने विकेट्स मिळवून देण्याचे काम केले होते. राज्यवर्धन हा मूळचा तुळजापूरचा असून तो १९ वर्षांचा आहे. त्यामुळे एवढ्या कमी वयात त्याला धोनीसारख्या परीसस्पर्श असलेल्या खेळाडूच्या सानिध्यामध्ये खेळण्याची संधी मिळणार आहे. त्यामुळे आता राज्यवर्धनला यंदाच्या आयपीएलमध्ये खेळण्याची संधी मिळते का आणि तो या संधीचे सोने करतो का, याकडे सर्वांचे लक्ष लागलेले असेल.
