म. टा. प्रतिनिधी । पिंपरी

आगामी पिंपरी-चिंचवड महापालिका निवडणुकीच्या (Pimpri Cinchwad Municipal Election) तोंडावर सत्ताधारी भाजपला झटका बसला आहे. प्रभाग क्रमांक दोन मोशी-जाधववाडी भागाचे प्रतिनिधित्व करणारे वसंत बोराटे (Vasant Borate) यांनी भाजप नगरसेवक पदाचा राजीनामा दिला आहे. प्रभागाच्या विकासासाठी सहकार्य केले नाही. तसेच आणि पक्षात काम करताना स्वाभिमान दुखावला जात होता, असे सांगत वसंत बोराटे यांनी बुधवारी (१६ फेब्रुवारी) महापालिका अतिरिक्त आयुक्त विकास ढाकणे यांच्याकडे आपला राजीनामा दिला आहे.

वाचा: पुण्यात तणाव; अतिक्रमणविरोधी कारवाई थांबवण्यासाठी महिला इमारतीवर

वसंत बोराटे हे प्रभाग क्रमांक दोन मोशी-जाधववाडी भागातून २०१७ मध्ये भाजपच्या चिन्हावर महापालिकेवर निवडून आले आहेत. शांत, संयमी राजकारणी अशी त्यांची ओळख आहे. मागील पाच वर्षांत आमदार महेश लांडगे यांनी बोराटे यांना पदासाठी खेळवत ठेवल्याचे बोलले जात आहे. मध्यंतरी नाराज बोराटे यांची विधी समितीच्या सदस्यपदी बोळवण करण्याचा प्रयत्न केला. पण, स्वाभिमानी बोराटे यांनी तडकाफडकी राजीनामा दिला. त्यांना महापौर, उपमहापौर, स्थायी समिती सदस्य, विषय समिती सभापती, प्रभाग समिती अध्यक्ष असे एकही पद दिले नाही. त्यामुळे त्यांची नाराजी वाढली होती. या नाराजीतून त्यांनी भाजपला रामराम ठोकला आहे. बोराटे राष्ट्रवादी काँग्रेसमध्ये जाण्याची शक्यता वर्तविली जात आहे. नगरसेवक वसंत बोराटे यांचा राजीनामा आला असल्याचे आयुक्त राजेश पाटील सांगितले.

Vasant-Borate

वसंत बोराटे यांचा राजीनामा

‘भारतीय जनता पक्षात काम करताना स्वाभिमान दुखावला जात होता. शेवटपर्यंत पक्षाने सन्मान दिला नाही. सन्मानाने वागविले नाही. अशीच मानसिकता आणि खदखद अनेक नगरसेवकांच्या मनात आहे. परंतु, ते स्पष्टपणे व्यक्त करू शकत नाहीत. मोशी-जाधववाडी भागाच्या विकासासाठी, जनतेसाठी मला हा निर्णय घ्यावा लागत आहे. माझी पुढील राजकीय भूमिका लवकरच स्पष्ट करणार आहे.’ – वसंत बोराटे

वाचा: दहशत निर्माण करण्यासाठी साधलं वाढदिवसाचं निमित्त; पाहा पुण्यात काय घडलं?

LEAVE A REPLY

Please enter your comment!
Please enter your name here