अहमदनगर : ‘चहाच्या दुकानाला सरपंच, उपसरंपच अशी नावे दिलेलं काहींना सहन झालं नाही. त्याविरोधात त्यांनी आवाज उठवला. मात्र, अनेक प्रकारच्या दुकानांना आपले राष्ट्रपुरूष आणि संतांची नावे दिली आहेत. अशा पाट्या तुम्ही कशा सहन करता?’ अशा शब्दांत कीर्तनकार निवृत्ती महाराज देशमुख इंदुरीकर यांनी ठणकावलं आहे. यापुढे कोणत्‍याही दुकानांवर राष्‍ट्रपुरुष आणि संतांची नावे न लावण्‍याचा संकल्‍प शिवजयंतीच्‍या निमित्‍ताने करण्‍याचं आवाहनही त्‍यांनी केलं आहे. (Indurikar Maharaj Ahmednagar Updates)

लोणी बुद्रूक येथे शिवजयंती उत्‍सव समितीच्‍या वतीने शिवजयंती सप्‍ताहाचे आयोजन करण्‍यात आलं आहे. या सप्‍ताहाचे उद्घाटन इंदुरीकरांच्या हस्‍ते करण्‍यात आले. त्यावेळी ते बोलत होते. भाजपचे ज्येष्ठ नेते आमदार राधाकृष्‍ण विखे पाटील यांच्‍या मार्गदर्शनाखाली आणि खासदार डॉ. सुजय विखे पाटील यांच्‍या नेतृत्‍वखाली गेल्या ३७ वर्षांपासून लोणीत एक गाव, एक शिवजयंती हा उपक्रम राबवला जातो. यावर्षीच्या सप्ताहाचं नुकतंच उद्घाटन करण्यात आलं. यावेळी माजी मंत्री आण्‍णासाहेब म्‍हस्‍के पाटील, जिल्‍हा परिषदेच्‍या माजी अध्‍यक्षा शालिनीताई विखे पाटील, खासदार डॉ. सुजय विखे पाटील, सरपंच श्रीमती कल्‍पना मैड, उपसरपंच गणेश विखे उपस्थित होते.

राष्ट्रवादीत आता युवा पर्व; रोहित पवारांवर पक्षाने सोपवली ‘ही’ मोठी जबाबदारी

या कार्यक्रमात बोलताना इंदुरीकरांनी आपल्या खास शैलीत दुकानांच्या पाट्यांचा विषय छेडला. ते म्हणाले, ‘सरपंच आणि उपसरपंच यांच्‍या नावाने चहाची दुकाने टाकली गेली तर हा आमच्‍या पदाचा अपमान आहे असे सांगून त्‍यांनी ही नावे देण्‍यास विरोध केला. अडीच वर्षे पदावर राहणाऱ्या व्यक्तींना हे सहन होत नाही, तर वर्षानुवर्षांचा इतिहास असलेल्‍या राष्‍ट्रपुरुषांचा, संतांचा अपमान दुकानांवर पाट्या लावून होत नाही का? आपल्‍या राष्‍ट्र पुरुषांची किंवा संतांची होत असलेली अवहेलना आपण थांबवू शकलो नाही तर धर्म टिकणार कसा? कोणताही व्‍यवसाय राष्‍ट्रपुरुष आणि संतांच्‍या नावाने सुरू केला जातो. संताचा विचार वारकरी संप्रदायाने जपला, म्‍हणून आज धर्म टिकून आहे. राष्‍ट्रपुरुषांनी त्याग केला, कष्ट घेतले म्‍हणून स्‍वातंत्र्य आणि स्‍वराज्‍य मिळाले हे आपण विसरलोच कसे? त्‍यांच्‍या स्‍मृती विचाराने आणि कृतीने जागृत ठेवण्‍याची आवश्‍यकता असताना आता संत आणि राष्‍ट्रपुरुष समाजात फक्‍त नाव देण्‍यापुरतेच राहिले आहेत,’ अशी खंतही त्यांनी व्यक्त केली.

विखे पाटलांबद्दल काय म्हणाले इंदुरीकर महाराज?

विखे पाटील यांच्याबद्दल बोलताना इंदुरीकर महाराज म्हणाले की, ‘शिवजयंतीचा उत्‍सव फक्‍त गर्दी जमवण्‍यासाठी नाही तर विचारांचे मंथन करण्‍यासाठी झाला पाहिजे. विखे पाटलांच्या पुढाकारातून सलग ३७ वर्षे एक गाव एक शिवजयंती हा उत्‍सव कौतुकास्पद आहे. विखे पाटील परिवाराने सर्व समाज घटकांना एकत्रित ठेवून आजपर्यंत वाटचाल केली. सहकाराचा मंत्र येथील मातीत रुजवला. शिक्षणाची पायाभरणी करुन, असंख्‍य पिढ्यांचे भविष्‍य घडवण्‍याचं मोठं काम केलं,’ अशी स्तुतीसुमने इंदुरीकर महाराज यांनी उधळली आहेत.

दरम्यान, सावित्रीबाई फुले पुणे विद्यापीठाचा जीवन साधना गौरव पुरस्‍कार मिळाल्‍याबद्दल विखे पाटील यांचा यावेळी ग्रमस्थांच्या वतीने सत्कार करण्यात आला.

LEAVE A REPLY

Please enter your comment!
Please enter your name here