मुलीच्या रडण्याचा आवाज आल्याने आईने घेतली धाव; अत्याचार करणाऱ्याला अखेर कोर्टाकडून शिक्षा! – nandurbar sessions court sentences accused of sexually abusing two-year-old girl to 10 years in prison

नंदुरबार : तालुक्यातील वाघोदा शिवारात दोन वर्षांच्या मुलीवर अत्याचार करणाऱ्या आरोपीला १० वर्ष सश्रम कारावासाची शिक्षा नंदुरबार सत्र न्यायालयाने ठोठावली आहे. ३१ ऑगस्ट २०२० रोजी सदर घटना घडली होती. शिवदास ऊर्फ काल्या भाईदास ठाकरे असं शिक्षा झालेल्या नराधमाचं नाव आहे. पीडितेच्या आईने पोलीस स्थानकात तक्रार दिल्यानंतर आरोपीवर याप्रकरणी गुन्हा दाखल झाला होता. (Rape Case Accused)

याबाबत पोलिसांनी दिलेल्या माहितीनुसार, वाघोदा येथील फिर्यादी महिला या पती, सासू-सासरे, दीर आणि मुले अशा कुटुंबासह राहात असून सदर महिलेचे पती हे मिस्तरी काम व दीर आणि सासू मजुरी काम करुन कुटुंबाचा उदरनिर्वाह करतात. ३१ ऑगस्ट २०२० रोजी सकाळी ८ वाजेच्या सुमारास फिर्यादी महिलेच्या घरातील सर्व सदस्य मजुरीच्या कामानिमित्त घराबाहेर गेले होते. तसंच फिर्यादीचे सासरे हे गावात फिरण्यासाठी गेले होते. घरात महिलेसह त्यांची २ वर्षांची पीडित मुलगी आणि दोन्ही मुले होती. सकाळी ११ वाजताच्या सुमारास महिलेची मुलगी ही आरोपी शिवदास ऊर्फ काल्या भाईदास ठाकरे याच्या अंगणात खेळत होती, तर फिर्यादी महिला आपल्या घरासमोर भांडी घासत होती. थोड्या वेळाने महिलेला त्यांच्या मुलीचा जोरजोरात रडण्याचा आवाज आल्याने तिने आरोपी शिवदास ठाकरे याच्या घरी धाव घेतली. तेव्हा घराचा पुढील दरवाजा उघडा होता व आतल्या खोलीचा दरवाजा आरोपीने आतून बंद केला होता. फिर्यादीने बंद दरवाज्याजवळ जावून आपल्या मुलीला आवाज दिला असता आरोपी शिवदासने त्याच्या घराचा दरवाजा उघडून पीडित बालिकेला घराबाहेर काढलं. यावेळी बालिकेच्या गुप्तांगातून रक्त निघून जखम झालेली फिर्यादी यांना दिसली होती.

merger of st: एसटीच्या विलीनीकरणाचा अद्याप निर्णय नाहीच; सरकारची हायकोर्टात माहिती

याप्रकरणी उपनगर पोलीस ठाण्यात गुन्हा दाखल करण्यात आला होता. सदर गुन्ह्याचा तपास उपनगर पोलीस ठाण्याचे तत्कालीन पोलीस निरीक्षक बाळासाहेब भापकर यांनी करुन आरोपीविरुद्ध न्यायालयात मुदतीत दोषारोपपत्र सादर केले होते. सदर खटल्याची सुनावणी आशुतोष भागवत, अति. जिल्हा व सत्र न्यायाधीश नंदुरबार यांच्या कोर्टात होऊन आरोपी शिवदास ऊर्फ काल्या भाईदास ठाकरे (रा.वाघोदा, ता.जि.नंदुरबार) याच्याविरुद्ध बा.लै.अ.का.क.(पोक्सो)- ४ अन्वये गुन्हा सिद्ध झाल्याने न्यायालयाने सदर आरोपीस १० वर्ष सश्रम कारावास व १ हजार रुपये दंडाची शिक्षा सुनावली आहे.

दरम्यान, सदर खटल्याचे कामकाज अभियोग पक्षातर्फे अतिरीक्त जिल्हा सरकारी वकील ॲड.तुषार कापडीया यांनी पाहिले असून खटल्यात पैरवी अधिकारी म्हणून पोहेकॉ. नितीन साबळे व पोना.गिरीष पाटील यांनी केलं आहे.