बारामती : संसदेतील विशेष कामगिरीसाठी ‘प्राइम पॉइंट’ फाऊंडेशनतर्फे यंदाचे संसदरत्न पुरस्कार मंगळवारी जाहीर करण्यात आले. यामध्ये बारामती लोकसभा मतदारसंघातील राष्ट्रवादीच्या खासदार सुप्रिया सुळे यांना पुन्हा एकदा संसदरत्न पुरस्काराने गौरवण्यात आलं आहे. सलग सातव्यांदा या पुरस्काराची घोषणा झाल्यानंतर सुप्रिया सुळे यांनी हा सन्मान मतदारसंघातील प्रत्येकाचा असल्याचं सांगत आभार व्यक्त केले आहेत. (Sansad Ratna Award To Supriya Sule)

‘आपल्या बारामती लोकसभा मतदारसंघाचे प्रतिनिधित्व करत असताना केलेल्या संसदीय कार्याची दखल घेतली गेली, याचं समाधान आहे. हा सन्मान आपल्या मतदारसंघातील प्रत्येकाचा आहे. राष्ट्रवादी काँग्रेस पार्टी व मतदारांनी माझ्यावर विश्वास ठेवत मला संसदेत बारामती लोकसभा मतदार संघाचे प्रतिनिधित्व करण्याची संधी दिली,’ अशा शब्दांत सुप्रिया सुळे यांनी मतदारसंघातील नागरिकांचे आभार मानले आहेत. तसंच आपण सर्वजण आणि संसदेतील सहकारी, संसदेतील स्टाफ, माझे सर्व सहकारी यांची सातत्याने बहुमोल अशी साथ कायम मिळत आहे. याबद्दल मी सर्वांची शतशः ॠणी आहे. आपला हा विश्वास, हे प्रेम मला आपल्यासाठी काम करण्याची ऊर्जा देते. हा स्नेहबंध आणखी दृढ व्हावा ही प्रार्थना, असंही सुळे म्हणाल्या.

सुटकेचा निःश्वास सोडला! युक्रेनमधून दोनशेहून अधिक भारतीय मायदेशात दाखल

महाराष्ट्रातील एकूण ४ खासदारांचा समावेश

देशातील ११ खासदारांना यंदाचा संसदरत्न पुरस्कार जाहीर झाला आहे. यामध्ये सुप्रिया सुळे आणि शिवसेनेचे खासदार श्रीरंग बारणे यांना संसदेतील सातत्यपूर्ण कामगिरीसाठी ‘संसद विशिष्ट रत्न’ पुरस्काराने तर नंदुरबार लोकसभा मतदारसंघाच्या भाजप खासदार डॉ. हीना गावित आणि राष्ट्रवादीच्या खासदार डॉ. फौजिया खान यांना संसदरत्न पुरस्काराने सन्मानित केलं जाणार आहे. डॉ. हीना गावित यांना सदर संस्थेच्या वतीने सहाव्यांदा पुरस्कार जाहीर करण्यात आला आहे.

दरम्यान, ‘प्राइम पॉइंट’ फाऊंडेशनकडून होणारा हा १२ वा संसदरत्न पुरस्कार वितरण सोहळा २६ फेब्रुवारी रोजी दिल्लीत होणार आहे.

LEAVE A REPLY

Please enter your comment!
Please enter your name here