raj thackeray news today: मनसेचा १६वा वर्धापनदिन प्रथमच मुंबईबाहेर होणार, राज ठाकरे यांच्या कार्यकर्त्यांना सूचना – mns 16th anniversary to be held in pune instructions to raj thackeray party workers

पुणे : महाराष्ट्र नवनिर्माण सेनेचा १६वा वर्धापनदिन प्रथमच मुंबईबाहेर होणार असून, त्याचे आयोजन करण्याची संधी पुण्यातील मनसे कार्यकर्त्यांना मिळणार आहे. गणेश कला क्रीडा मंच येथे होणाऱ्या मेळाव्यात राज्यातील मनसेचे सर्व प्रमुख पदाधिकारी उपस्थित राहणार असून, या वर्धापनदिन सोहळ्यातून पक्ष महापालिका निवडणुकांसाठी रणशिंग फुंकण्याची शक्यता आहे.

मनसेचा वर्धापनदिन दर वर्षी मुंबईत होतो. राज्यभरातील मनसे कार्यकर्ते मोठ्या संख्येने या वर्धापनदिनाला हजेरी लावतात. पुण्यातील शहर आणि जिल्ह्याचे अनेक पदाधिकारी वर्धापनदिनासाठी मुंबईत हजेरी लावतात; पण यंदा प्रथमच वर्धापनदिन कार्यक्रम घेण्याची सर्व जबाबदारी मनसेच्या पुणे पदाधिकारी आणि कार्यकर्त्यांवर सोपविण्यात आली आहे. त्या दृष्टीने शहर मनसेकडून तयारी सुरू झाली असून, बुधवारी, नऊ मार्चला संपूर्ण दिवस गणेश कला क्रीडा मंच येथे विविध कार्यक्रम घेण्यात येणार आहेत. मनसेच्या कार्यकर्ता मेळाव्याची नेमकी वेळ अद्याप निश्चित झाली नसली, तरी सायंकाळी साडेपाचनंतरच मुख्य कार्यक्रम होण्याची शक्यता आहे. वर्धापनदिनानिमित्त मनसेकडून जोरदार शक्तिप्रदर्शन करण्यात येण्याची शक्यता असून, त्या दिवशीच्या कार्यक्रमाचे संपूर्ण नियोजन पुढील काही दिवसांत केले जाईल, अशी माहिती मनसेचे शहराध्यक्ष वसंत मोरे यांनी दिली.
कल्याण-डोंबिवलीसह ठाणे जिल्ह्यातील विद्यार्थी युक्रेनमध्ये अडकले; जिल्हा प्रशासनाने…
मुंबईप्रमाणेच पुणे, ठाणे, नाशिक अशा मनसेचा प्रभाव असलेल्या भागांत गेल्या महापालिका निवडणुकीत पक्षाला मोठा फटका बसला होता. गेल्या महापालिका निवडणुकांपेक्षा या वेळचे चित्र एकदम वेगळे आहे. राज्यात तीन पक्षांचे सरकार असून, भारतीय जनता पक्ष विरोधात आहे. त्यामुळे महाविकास आघाडी म्हणून एकत्र निवडणूक लढवली गेल्यास मनसेने भाजपसोबत युती करावी, अशी मागणी केली जात आहे. मनसे अध्यक्ष राज ठाकरे यांनी तूर्तास तरी स्वबळावरच निवडणूक लढविण्याच्या दृष्टीने तयारी करण्याच्या सूचना सर्व कार्यकर्त्यांना केल्या आहेत. त्यामुळे वर्धापनदिन मेळाव्यात त्या दृष्टीने काही घोषणा केली जाणार का, याकडे सर्व मनसैनिकांचे लक्ष असेल.

राज ठाकरे आज पुण्यात

मनसे अध्यक्ष राज ठाकरे आज, शनिवारी पुणे दौऱ्यावर आहेत. कसबा पेठ आणि नरवीर तानाजी मालुसरे रस्त्यावरील (सिंहगड रोड) कार्यकर्त्यांच्या कार्यालयाचे उद्घाटन त्यांच्या हस्ते होणार आहे. एस. एम. जोशी येथे सायंकाळी ‘पुण्यभूषण सर्वोत्तम दिवाळी अंक पुरस्कार’ समारंभाला ते प्रमुख पाहुणे म्हणून उपस्थित राहणार आहेत. या दरम्यान अथवा सायंकाळच्या कार्यक्रमानंतर पुण्याच्या प्रमुख पदाधिकारी, कार्यकर्त्यांसमवेत महत्त्वाची बैठक होण्याची शक्यता आहे.

राष्ट्रवादीच्या जिल्हाध्यक्षांची जीभ घसरली, अमृता फडणवीसांचा केला आक्षेपार्ह उल्लेख