जळगाव : चारित्र्यावर संशय घेऊन पतीने डोक्यात दगड घालून पत्नीचा खून केला आहे. ही घटना चाळीसगाव शहरातील पिरमुसा कादरी दर्ग्याच्या बाहेर डोंगरी नदीपात्रात शनिवारी रात्री १२ वाजताच्या सुमारास घडली. संशयित पतीला पोलिसांनी ताब्यात घेतलं आहे. मायाबाई प्रकाश उर्फ भुरा सोनवणे (वय ४०, रा. मुखेड, ता. सोयगाव, जि. औरंगाबाद) असं मृत महिलेचं, तर प्रकाश उर्फ भुरा रामदास सोनवणे असं संशयित पतीचं नाव आहे. (Jalgaon Murder Case)

सोयगाव तालुक्यातील मुखेड येथील रहिवासी प्रकाश सोनवणे हा पत्नी मायाबाई आणि कुटुंबातील इतर सदस्यांसह राहात होता. प्रकाश हा नेहमी पत्नी मायाबाई हिच्या चारित्र्यावर संशय घेऊन तिला दारूच्या नशेत शिवीगाळ करून मारहाण करायचा. त्यामुळे मायाबाईही दोन वर्षांपासून तिच्या माहेरी पाचोरा तालुक्यातील खाजोडा येथे राहात होती. दोन ते तीन महिन्यांपूर्वीच तिचा पती तिला घ्यायला आला. यावेळी दारू पिणार नाही व त्रास देणार नाही, असं वकिलामार्फत पती प्रकाश सोनवणे यांच्याकडून लिहून घेत मायाबाईला पुन्हा सासरी मुखेड येथे पाठवण्यात आले होते.

Prayagraj Blast: प्रयागराजमध्ये मतदान केंद्राजवळ बॉम्बस्फोट; सायकलला लावलेली पिशवी खाली पडताच…

मायाबाईच्या पोटात दुखत असल्याने ती चार दिवसांपासून जळगाव शहरातील पीर मुसा कादरी बाबाच्या दर्ग्यावर आली होती. मायाबाई व तिची आई भारताबाई याच ठिकाणी एका झोपडीत राहात होत्या. २६ फेब्रुवारी रोजी पती प्रकाश सोनवणे हा चाळीसगावला आला. त्याने दारूच्या नशेत पत्नी मायाबाई हिच्या चारित्र्यावर संशय घेऊन दिवसभर वाद घातला. याच वादातून प्रकाशने रात्री १२ वाजेच्या सुमारास पत्नी मायाबाई हिचा डोक्यात दगड घालून तिचा खून केला. मायाबाई हिच्या ओरडण्याचा आवाज आल्याने तिची आई भारताबाई झोपेतून उठली. त्यांना बघून संशयित प्रकाश जागेवरून पळून गेला.

दरम्यान, घटनेची माहिती भारताबाई यांनी पोलिसांना दिली. पोलिसांनी घटनास्थळ गाठून रूग्णवाहिकेतून जखमी मायाबाई हिला चाळीसगाव शहरातील शासकीय रुग्णालयात हलवले. तेथे प्राथमिक उपचारानंतर डॉक्टरांनी धुळे येथे उपचारासाठी हलवण्याचा सल्ला दिला. मात्र याठिकाणी उपचारादरम्यान रात्रीच मायाबाईचा मृत्यू झाला.

चाळीसगाव शहर पोलीस स्टेशनचे पोलीस निरिक्षक के.के.पाटील, सहायक पोलीस निरीक्षक दिपक बिरारी, सहायक पोलीस निरीक्षक सागर ढिकले यांच्यासह पोलीस हेडकॉन्स्टेबल पंकज पाटील, पोलीस नाईक विनोद भोई ,राहुल सोनवणे, भगवान उमाळे यांच्या पथकाने घटनेचा पंचनामा करत ज्या दगडाने खून केला तो दगड जप्त केला. याप्रकरणी मयत मायाबाई हिची आई भारताबाई विक्रम गायकवाड (वय ६० रा. खाजोडा ता.पाचोरा) हिच्या फिर्यादीवरून चाळीसगाव शहर पोलीस ठाण्यात खुनाचा गुन्हा दाखल करण्यात आला आहे. घटनेनंतर काही तासातच पोलिसांनी संशयित पती प्रकाश सोनवणे याचा शोध घेत त्याला ताब्यात घेतले. पुढील तपास सहाय्यक पोलीस निरीक्षक दीपक बिरारी हे करत आहेत.

LEAVE A REPLY

Please enter your comment!
Please enter your name here