गेल्या पाच दिवसांपासून बलाढ्य शत्रूसमोर न झुकता प्राणपणानं लढा देणाऱ्या कीव्हला उद्ध्वस्त करण्यासाठी आता रशियानं निर्णायक पावलं उचलली आहेत. रशियासमोर अत्यंत दुर्बल समजल्या जाणाऱ्या कीव्हच्या लष्करानं सामान्य नागरिकांच्या मदतीनं अनपेक्षितरित्या रशियाला बेजार करून सोडलंय. मात्र, या युद्धात आत्तापर्यंत जवळपास ४५०० रशियन सैनिक ठार झाल्याचा दावा युक्रेनकडून करण्यात आला. त्यानंतर आता सॅटेलाईट इमेजेसच्या मदतीनं रशियाची नवी खेळी समोर आलीय.
युक्रेनच्या मार्गावर रशियन लष्कराचा मोठा फौजफाटा वाटचाल करत असल्याचा खुलासा सॅटेलाईट इमेजेसमधून झालाय. रशियन सैनिकांचा आणि लष्करी वाहनांचा हा ताफा ६४ किलोमीटरपेक्षाही लांब असल्याचं समोर येतंय. या ताफ्यात रणगाड्याशिवाय सशस्त्र वाहनं, तोफगोळे तसंच इतर लष्करी वाहनांचा समावेश आहे. रशियन सैन्य सध्या राजधानी कीव्हपासून २५ किमी अंतरावर आहे.
‘मॅक्सर’च्या सॅटेलाईट इमेजेसमधून समोर आलेल्या माहितीनुसार, दक्षिण बेलारूसमध्ये भूदल आणि भू-हल्ला करण्यास सक्षम असणारे लढावू हेलिकॉप्टरदेखील तैनात करण्यात आले आहेत. रशियन सैनिकांचा हा ताफा इतका लांब आहे की कीव्हच्या मार्गावर ट्राफिक जामसारखं चित्रं दिसून येतंय.
Watch Video: युक्रेनमध्ये ‘जय जवान जय किसान’, शेतकऱ्यानं ट्रॅक्टरला बांधला शत्रुचा रणगाडा
Volodymyr Zelensky: बेलारूस चर्चेआधी युक्रेन अध्यक्ष झेलेन्स्की यांच्या दोन मागण्या…
सोमवारी, एकीकडे बेलारूसमध्ये रशियन आणि युक्रेनियन अधिकार्‍यांमधील शांतता चर्चेची पहिली फेरी सुरू होती तर दुसरीकडे युक्रेन सीमेजवळ बेलारूस रणगाडे आणि लष्करी वाहनांचा ताफा एका रांगेत दिसून आला. दरम्यान, रशिया आणि युक्रेनमध्ये युद्ध थांबवण्यासाठी आयोजित करण्यात आलेली चर्चेची पहिली फेरी निष्फळ ठरलीय.
बेलारूस लष्करी वाहनं देशाच्या नैऋत्य दिशेकडून पूर्वेकडे जाताना दिसले तसंच रशियासोबत बेलारूसचं सैन्यही युक्रेनवर हल्ला करण्याच्या तयारी असल्याचं वृत्त ‘डेली मेल’नं दिलंय.
दरम्यान, चर्चेदरम्यान कीव्ह अधिकाऱ्यांनी रशियाच्या मागण्या नाकारल्या तर युक्रेनवर हल्ला आणखी तीव्र करण्यासाठी हे निमित्त ठरू शकतं, असा इशारा निरीक्षकांनी दिला आहे. या चर्चेत युक्रेनचे संरक्षण मंत्री, राष्ट्रपती कार्यालयाचे प्रमुख सल्लागार आणि परराष्ट्र व्यवहार उपमंत्री यांचा समावेश होता, असं अहवालात म्हटलं गेलंय. तर दुसरीकडे रशियन शिष्टमंडळाचं नेतृत्व पुतीन यांच्या संस्कृती सल्लागारानं केलं.
युक्रेनचा कडवा प्रतिकार; रशियासोबतच्या चर्चेत सैन्य मागे घेण्याची भूमिका
Russia Ukraine War: युद्धात ‘काही’ सैनिक मारले गेले, रशियाची पहिल्यांदाच कबुली
