पुढील सूचनेपर्यंत राज्यात सोहळे नाहीच: CM

मुंबई: करोनाचं संकट प्रचंड मोठं आहे. राज्यातील करोना रुग्णांची संख्याही वाढत असून आता आपण करोनाविरुद्धच्या लढाईच्या एका महत्त्वाच्या टप्प्यावर आलो आहोत, असं सांगतानाच पुढील सूचनेपर्यंत राज्यात कोणत्याही धार्मिक, राजकीय, सांस्कृतिक आणि इतर सोहळ्यांना परवानगी दिली जाणार नाही. राज्यात कोणताही सोहळा होणार नाही, असं मुख्यमंत्री यांनी स्पष्ट केलं.

मुख्यमंत्री उद्धव ठाकरे यांनी आज फेसबुकवरून राज्यातील जनतेशी संवाद साधला. यावेळी उद्धव ठाकरे यांनी राज्यातील जनतेला घरातच थांबण्याचं आणि आपल्या कुटुंबीयांची काळजी घेण्याचं आवाहन केलं. करोनाविरुद्धच्या लढाईच्या एका महत्त्वाच्या टप्प्यावर आपण आलो आहोत. ही लढाई अटीतटीची आहे. त्यामुळे आणखी काळजी घेण्याची गरज आहे. म्हणूनच खबरदारीचा उपाय म्हणून पुढील सूचनांपर्यंत राज्यात कोणताही उत्सव, धार्मिक कार्यक्रम, राजकीय, सांस्कृतिक कार्यक्रम आणि क्रीडा स्पर्धा होणार नाहीत. अशा कार्यक्रमांना परवानगी दिली जाणार नाही, असं त्यांनी स्पष्ट केलं. गुढीपाडवा, पंढरपूरवारी, रामनवमी आदी सर्व सण आपण घरात साजरे केले. अन्य धर्मियांनीही घरातच सण साजरे करावेत, असं कळकळीचं आवाहनही त्यांनी केलं. तबलिगींचा कार्यक्रम आम्ही महाराष्ट्रात होऊ दिला नाही, मरकजमधून आलेले १०० टक्के लोक विलगीकरण कक्षामध्ये उपचार घेत असल्याचंही त्यांनी स्पष्ट केलं.

म्हणून रुग्ण वाढले

महाराष्ट्रात गेल्या चार-पाच दिवसांपासून रुग्णांची संख्या वाढली आहे. हे खरं आहे. मी खोटं बोलणार नाही. मला खोटं बोलता येत नाही. जगभर करोनाच्या रुग्णांच्या संख्येत वाढ होत आहे. त्याला आपण अपवाद ठरू शकत नाही, असं सांगतनाच गेल्या काही दिवसांत आपण करोना रुग्णांच्या चाचण्यांची संख्या वाढवली आहे. तसेच आपण स्वत:हून करोना रुग्णांचा शोध घेत आहोत. त्यामुळे ही संख्या वाढली आहे, असं त्यांनी सांगितलं. राज्यातील करोना रुग्ण पाचशेच्या आसपास गेले आहेत. मात्र ५१ रुग्णांना ठणठणीत बरे करण्यातही आपण यशस्वी झाल्याचंही त्यांनी निदर्शनास आणून दिलं. करोना रोखायचा असेल तर सिंगापूरच्या धर्तीवर घरच्या घरी कापडाचा मास्क तयार करा. बाहेर जीवनावश्यक वस्तू आणायला जाताना हा मास्क तोंडाला लावून जा. शक्यतो घरातूनच काम करा. घरात रहा. ज्येष्ठांची काळजी घ्या, अशा महत्त्वपूर्ण सूचनाही त्यांनी केल्या.

यावेळी त्यांनी वाढदिवसाच्या खर्चाचे पैसे मुख्यमंत्री सहाय्यता निधीला देणाऱ्या सात वर्षाच्या आराध्याचं कौतुक केलं. आराध्यासारख्या लहान मुलांना या धोक्याची जाणीव होत असेल तर आपण हे युद्ध जिंकलंच म्हणून समजा, असंही ते म्हणाले. तसेच क्वॉरंटाइनची उपकरणे ठेवण्यासाठी आपलं कार्यालय दिल्याबद्दल अभिनेता शाहरुख खान, ताज हॉटेलमध्ये डॉक्टरांना राहण्या-खाण्याची व्यवस्था करणाऱ्या उद्योगपती टाटा आणि इतरांचे त्यांनी आभार मानले.