कीव्ह, युक्रेन :

रशियाचे अध्यक्ष व्लादिमीर पुतीन यांनी युक्रेनवर हल्ला करण्याचे मनसुबे आखले खरे पण रशियन सेनेला मात्र आपल्या अध्यक्षांच्या या भूमिकेवर किती विश्वास आहे? हा विचार करायला भाग पाडणारे काही व्हिडिओ सोशल मीडियावरून व्हायरल होत आहेत. हे व्हिडिओ आहेत सध्या युक्रेनच्या ताब्यात असलेल्या रशियन लष्करातील जवानांचे… या व्हिडिओत हे रशियन जवान आपल्या कुटुंबीयांशी फोनवरून संवाद साधताना दिसत आहे. युद्धकैदी बनवलेल्या रशियाच्या जवानांना आपल्या घरी फोन करण्याची संधी युक्रेन सैन्यानं दिली आहे. या व्हिडिओत आपल्या भविष्याविषयी अनिश्चित असलेल्या आणि मनोबल ढासळलेल्या अवस्थेतील रशियन सैनिक कुटुंबीयांशी बोलताना भावूक झालेले दिसून येत आहेत.

महाबलाढ्य रशियन सैनिकांचं मनोबल ढासळतंय?

युक्रेनचे संरक्षण मंत्री ओलेक्सी रेजनिकोव्ह यांनी केलेल्या दाव्यानुसार, ५७१० हून अधिक रशियन सैनिकांचा आतापर्यंत मृत्यू झाला. तर पश्चिमी देशांच्या गुप्तचर यंत्रणांच्या म्हणण्यानुसार, आतापर्यंत पाच हजारांहून अधिक रशियन सैनिकांना बंदी बनवण्यात आलंय किंवा ते ठार झाले आहेत.

युक्रेन हल्ल्यात भाग घेणारे रशियन सैनिक ‘अत्यंत घाबरलेल्या’ अवस्थेत आहेत. हे एका ब्रिटीश गुप्तचर कंपनीच्या व्हॉइस रेकॉर्डिंगवरून दिसून आलंय. रशियन सैनिकांनी आपल्या सेंट्रल कमांडच्या आदेशांचं पालन करण्यास तसंच युक्रेनियन शहरांवर हल्ले, गोळीबार करण्यास स्पष्ट शब्दांत नकार दिला आहे, असं या रेकॉर्डिंगमधून समोर आलंय. या सैनिकांना अन्न आणि इंधनाच्या कमतरता जाणवत आहे. गेल्या आठवड्यात युक्रेनवर हल्ला सुरू झाल्यापासून ‘शॅडोब्रेक’ या गुप्तचर संस्थेनं रेकॉर्डिंग मिळवलं आहे.

‘द टेलिग्राफ’नं या सैनिकांची रेकॉर्डींग ऐकून वृत्तांकन केलंय. एक सैनिक रडवेल्या अवस्थेत आढळून आला. दुसऱ्या एका रेकॉर्डिंगमध्ये आणखी एका रशियन सैनिकाचा राग अनावर झालेला दिसून आला. ‘आम्हाला इंधन आणि अन्नपदार्थ कधीपर्यंत मिळतील?’ असा प्रश्न तो विचारत होता. ‘आम्ही इथं तीन दिवसांपासून आहोत, कधीपर्यंत तयारी पूर्ण होणार?’ असा प्रश्न एक सैनिक तिसऱ्या संदेशात विचारताना आढळून आला.

‘आपण एखाद्या जागेवर तेव्हापर्यंत तोफेनं हल्ला करू शकत नाही जेव्हापर्यंत सामान्य नागरिक तिथून निघून जात नाहीत’ असं एका संदेशात एक रशियन सैनिक आपल्या सहकाऱ्याला आठवण करून देताना आढळून आला.

Russia Ukraine War: अब्जावधी खर्च, अनेक मृत्यू, लाखो बेघर; करोनानंतर रशिया युक्रेन युद्ध ‘महागात’
Joe Biden: रूबलचा भाव पडलाय, रशियाच्या शेअर बाजारातही हलकल्लोळ; अमेरिकेकडून रशियाच्या अभूतपूर्व आर्थिक कोंडीचा इशारा
रशियन सैनिकांमध्ये व्यवस्थापनाचा अभाव

युक्रेनवर हल्ला करणाऱ्या रशियन सैनिकांचा गोंधळ उडालाय. कोण कुठे जातंय? एकमेकांशी संवाद कसा साधायचा? असे साधे प्रश्न त्यांना पडलेत. अशा वेळी निराशेत ते आपल्या अश्रूंना वाट मोकळी करून देत आहेत तसंच एकमेकांचा अपमानही करत आहेत, असं ‘शॅडोब्रेक’चे संस्थापक सॅम्युअल कार्डिलो यांनी द टेलिग्राफसोबत बोलताना म्हटलंय.

सामान्य नागरिकांवर क्षेपणास्त्रं डागण्याचे आदेश

यातील काही संदेश युद्ध गुन्ह्यांचे पुरावे आहेत कारण त्यातून ‘सैनिकांना रहिवासी भागात क्षेपणास्त्रांनी हल्ले करण्याचे आदेश देण्यात आल्याचं’ उघड होतंय असंही कार्डिलो यांनी म्हटलंय.


‘आत्महत्या करावीशी वाटतेय’

‘डेलीमेल’नं दिलेल्या वृत्तानुसार, आणखी एका व्हिडिओत रशियन सैनिक निराश होऊन रशियाला परतताना दिसून आले. रिपोर्ट्सनुसार, एका रशियन सैनिकानं त्याच्या आईला केलेल्या मॅसेजमध्ये ‘आपल्याला आत्महत्या करावीशी वाटतेय’ असा मॅसेज केलेला आढळून आला.

अमेरिकेच्या संरक्षण अधिकाऱ्यांनी दिलेल्या माहितीनुसार, रशियन सैनिकांचे मनोधैर्य खचले आहे. ‘युद्ध टाळण्यासाठी काही रशियन सैनिक आपल्या लष्करी वाहनांच्या पेट्रोल टाक्यांमध्ये जाणूनबुजून छिद्र पाडत आहेत’ असंही ‘न्यूयॉर्क टाइम्स’शी बोलताना एका अमेरिकन अधिकाऱ्यानं म्हटलंय.


पुतीन यांच्याकडून रशियन सैनिकांची फसवणूक?

सोशल मीडियावर दिसून आलेल्या अनेक व्हिडिओंमध्ये युक्रेनमध्ये युद्धकैदी बनलेल्या अनेक रशियन सैनिकांचे अश्रू आपल्या कुटुंबियांसोबत फोनवर बोलत असताना थांबत नसल्याचं दिसून आलं.

‘मी युक्रेनच्या हद्दीत आहे आणि युक्रेनच्या सैन्यानं मला बंदी बनवलं आहे. पण मी ठीक आहे. आमची फसवणूक झाली आहे. आम्ही शांती सैनिक आहोत असं आम्हाला वाटत होतं’ असं एक रशियन सैनिक आपल्या आईशी बोलताना दिसून आला.

सोशल मीडियावरून व्हायरल होणाऱ्या या व्हिडिओंची पुष्टी करणं युद्धाच्या वातावरणात कठीण जातंय.

रशियाकडून व्हॅक्यूम बॉम्बचा वापर केल्याचा आरोप; व्हॅक्यूम बॉम्ब म्हणजे काय?
volodymyr zelenskyy : युक्रेनच्या अध्यक्षांनी ‘हे’ पाऊल उचलत रशियावर टाकला ‘बॉम्ब’!, युरोपियन संसदेने दिले स्टँडिंग ओवेशन

LEAVE A REPLY

Please enter your comment!
Please enter your name here