Vidhansabha LIVE: अधिवेशनाचा पहिला दिवस गाजला, दुसऱ्या दिवशी मलिकांचा राजीनामा आणि ओबीसी आरक्षणावरून संघर्ष?देवेंद्र फडणवीस यांच्या सागर बंगल्यावर गुरुवारी रात्री भाजप आणि मित्र पक्षातील सर्व आमदारांसाठी स्नेहभोजनाचा कार्यक्रम आयोजित करण्यात आला होता. यावेळी देवेंद्र फडणवीस यांनी अधिवेशनातील आगामी रणनीती निश्चित केली. त्यामुळे आता भाजपचे आमदार राज्य सरकारला घेरण्यासाठी काय काय करणार, हे पाहावे लागेल.
अधिवेशनाच्या पहिल्या दिवशी राज्यपाल भगतसिंह कोश्यारी यांच्याबाबत घडलेल्या प्रकारामुळे भाजप काहीसा बॅकफूटवर गेला होता. पहिल्याच दिवशी सभागृहात नवाब मलिकांच्या मुद्द्यावरून सरकारला लक्ष्य करण्याची भाजपची रणनीती होती. मात्र, राज्यपाल कोश्यारी अभिभाषण अर्धवट सोडून गेल्यामुळे सर्वचजण बुचकाळ्यात पडले होते. त्यानंतर महाविकासआघाडीच्या नेत्यांनी राज्यपालांच्या या कृतीवर टीका करायला सुरुवात केली होती. राज्यपाल राष्ट्रगीतासाठीही थांबले नाहीत, हा मुद्दाही महाविकासआघाडीच्या आमदारांनी उपस्थित केला होता. त्यामुळे पहिल्याच दिवशी अत्यंत आक्रमकपणे सरकारला घेरण्याची भाजपची रणनीती तितकीशी यशस्वी ठरली नव्हती. मात्र, अधिवेशनाच्या दुसऱ्या दिवशी भाजपकडून या सगळ्याची कसर भरून काढली जाऊ शकते.
