जिल्ह्यात आतापर्यंत २० करोनाबाधीत रुग्ण सापडले आहेत. यापैकी दोन रुग्णांचे चौदा दिवसांनंतरचे अहवाल निगेटिव्ह आल्यामुळे त्यांना रुग्णालयातून डिस्चार्ज देण्यात आला. मात्र, करोनाबाधीत रुग्णांच्या संपर्कात येणाऱ्या नागरिकांना ताब्यात घेऊन त्यांची तपासणी करण्याचे काम जिल्हा आरोग्य विभागाने वेगाने सुरू केले आहे.
शनिवारी जिल्हा रुग्णालयाने पुण्याच्या ‘एनआयव्ही’कडे ७३ जणांचे स्त्राव नमुने चाचणीसाठी पाठवले होते. त्यापैकी रात्री साडेसातच्या सुमारास ३५ अहवाल प्राप्त झाले आहेत. त्यामध्ये नगर शहरातील मुकुंदनगर परिसरातील एकाचा अहवाल पॉझिटिव्ह आला होता. तर, रात्री साडे दहा वाजता आणखी ३८ जणांचे अहवाल प्राप्त झाले आहेत. त्यामध्ये नगर शहरातील एक व लोणी येथील एक, असे दोन जणांचे अहवाल पॉझिटिव्ह आले आहेत. त्यामुळे शनिवारी दिवसभरात तीन जणांना ‘करोना’ची लागण झाल्याचे स्पष्ट झाले असून, या सर्वांना ‘आयसोलेशन वॉर्ड’मध्ये ठेवण्यात आले आहे. जिल्हा शल्यचिकित्सक डॉ. प्रदीप मुरंबीकर यांनी ही माहिती दिली.
Maharashtra News, Latest Maharashtra News in Marathi, महाराष्ट्र ठळक बातम्या | Maharashtra Times
